चलचित्र ‘ए मेरो हजुर ३’ ले ओपनिङ विजनेशमा आक्रमक शुरुवात गरेको छ । निर्माण पक्षले दिएको जानकारी अनुसार शुक्रबार अधिकांश शोहरु हाउसफूल भएका छन् । देशभरको व्यापारका आधारमा ८० प्रतिशत भन्दा बढी अकुपेन्सी रहेको बताइएको छ ।

मल्टिप्लेक्स र सिंगल सबै थियटरमा चलचित्रले राम्रो व्यापार गरेको छ । ए मेरो हजुरको तेस्रो सिरिज भएका कारण पनि चलचित्र प्रतिको आकर्षण बढेको अनुमान गरिएको छ । त्यसो त अनमोल केसी लभस्टोरी चलचित्रमा कमव्याक भएका छन् । विचमा अन्य जनराका दुई चलचित्रमा अभिनय गरेका अनमोल लभस्टोरीमा फर्कनुलाई पनि दर्शक तान्ने अस्त्रका रुपमा लिइएको छ । यस्तै यसका गीतसंगीतले पनि चलचित्र प्रतिको आकर्षण बढाएका छन् ।

यता प्रिमियर शोमा डेव्यु अभिनेत्री सुहाना थापाको कामको खुलैरै प्रसंसा भएको थियो । चलचित्र पूर्ण मनोरञ्जनात्मक भएको प्रतिक्रिया मिलेको थियो । माउथ पव्लिसिटी पनि बलियो आधार भएको भन्दै शनिबार र आइतबार चलचित्रले बम्पर व्यापार गर्ने निर्माण पक्षको विश्वास छ ।

नयाँ वर्षको अवसर पारी प्रदर्शनमा आएको चलचित्रलाई झरना थापाले निर्देशन गरेकी हुन । चलचित्रमा अनमोल र सुहानाका अलवा सलोन बस्नेत, अर्पण थापा, सरोज खनाल, विशाल पहाडीलगायतका कलाकारको अभिनय रहेको छ । चलचित्र म्युजिकल लभस्टोरी जनराको हो । जहाँ म्युजिकल स्टार र फ्यान बिचको प्रेम देखाइएको छ ।