आज शुक्रबारबाट दुई नयाँ नेपाली चलचित्र ‘ऐना झ्यालको पुतली’ र ‘गोर्खाः बिनिथ द ब्रेभरी’ देशव्यापी प्रदर्शन आएका छन् । चलचित्र ‘ऐना झ्यालको पुतली’ले सपनाको कथा भनेको छ भने ‘गोर्खाः बिनिथ द ब्रेभरी’ले इतिहासको कथा भनेको छ ।

विभिन्न अन्तर्राष्ट्रिय फेस्टिभलहरुमा अवार्ड समेत जितेको ‘ऐना झ्यालको पुतली’लाई सुजित बिडारीले निर्देशन गरेका हुन् । केही दिनअघि भएको प्रिमियरमा प्रशंसा बटुलेको चलचित्रमा सिरु बिष्ट, कञ्चन चिमरिया, दिनेश खत्री, उमेश श्रेष्ठ, अशोक सिवाकोटीको अभिनय छ । चलचित्रका निर्माता आकाश पौडेल, प्रविन स्याङ्बो, सुशान्त श्रेष्ठ, रामकृष्ण पोखरेल र निर्देशक सुजित बिडारी हुन् ।

त्यस्तै, गोर्खाहरूका लागि पहिलो पटक भिक्टोरिया क्रस प्राप्त गर्ने राइफलम्यान कुलवीर थापाको वास्तविक कथामा आधारित भएर निर्माण भएको ‘गोर्खाः बिनिथ द ब्रेभरी’लाई प्रदीप शाहीले निर्देशन गरेका हुन् । चलचित्रमा समिर गुरुङ, गौमाया गुरुङ, ओली बस्सी, स्टुअर्ट वाल्कर, एगिस्टिनो ओबरहोफर, रोबिन फ्रिबर्ग, राजन गुरुङ, सूर्य गुरुङ, स्योन शाहीलगायतको अभिनय छ ।

यस्तै गत साताबाट प्रदर्शनमा आएको चलचित्र  ‘झिङ्गेदाउ’ दोस्रो सातामा प्रदर्शन भएको छ भने भाद्र १० बाट प्रदर्शनमा आएको चलचित्र ‘प्रकाश’ तेस्रो सातामा प्रदर्शनरत् छ । यि दुबै चलचित्रले माउथ पब्लिसिटी राम्रो भएका कारण दोस्रो र तेस्रो सातामा पनि उल्लेख्य शो पाएका छन् ।