कलाकार दयाहाङ राईले चलचित्र ‘आप्पा’ दर्जलिङदेखी सन्दकपुर सम्मको यात्राको कथा रहेको बताएका छन् । उनले चलचित्रमा आफ्नो भूमिका बिर्खे नाम गरेको एक ड्राईभरको रहेको र त्यही ड्राईभरको वरीपरी नै कथा घुमेको खुलाए । एउटा ड्राईभरले गाडी चलाउँदा केके भोग्न पर्छ भन्ने कथा चलचित्रले उठान गरेको दयाहाङले बताएका छन् । मोफसल प्रमोशनल टुरमा रहेको निर्माण टिमले चितवनको नारायणघाटमा आयोजित पत्रकार सम्मेलनका बिच दयाले उक्त कुरा बताएका हुन् ।

त्यसो त सोही कार्यक्रममा चलचित्र नेपाल सहित भारतका केही शहरहरुमा एकसाथ प्रदर्शनमा आउने जानकारी समेत दिइएको छ । निर्देशक अनमोल गुरुङका अनुसार असार १३ गतेबाट प्रदर्शन हुने चलचित्र ‘आप्पा’ नेपाल सँगै भारतको २५ वटा हलहरुबाट एक साथ प्रदर्शन हुने छ । उनले लामो समय पछी नेपाली चलचित्र सेम डे भारतमा पनि रिलिज हुन लागेको बताए । ‘आप्पा’ भारतको नयाँ दिल्ली, कोलकता, मुम्बई, सिक्किम, आसाम, दार्जलिङ, सिलोङलगायतका शहरहरुमा प्रदर्शनमा आउने जनाइएको छ । निर्देशक गुरुङले पत्रकार भेटघाटमा ‘आप्पा’ राम्रो चलचित्र बनेकोले एक पटक हेरेर प्रतिकृया दिन दर्शकलाई आग्रह समेत गरेका छन् । 

बाबु छोराको सम्बन्धको कथा भन्ने चलचित्रका कार्यकारी निर्माता माबो चेम्जोङ्ग हुन् । अ माउन्टेन स्टोरीज प्रोडक्सन र सिनेमा आर्टको संयुक्त ब्यानरमा निर्माण भएको चलचित्रमा रुदेन सादा लेप्चाको लगानी रहेको छ । चलचित्रमा दयाहाङ राई, सिद्धान्त राज तामाङ र अल्लोना काबो लेप्चाका अलवा बरिष्ठ निर्देशक तुलसी घिमिरे, अरुणा कार्की लगायतका कलाकारको अभिनय रहेको छ । चलचित्रमा निर्देशक गुरुङकै कथा, गुरुङ र उमेश उपमाको पटकथा तथा संवाद, शैलेन्द्र डि कार्कीको छायाँकन, निर्देशक गुरुङ र शैकात देवको संगीत र निमेष श्रेष्ठको सम्पादन रहेको छ ।