राजधानीमा आयोजित चलचित्र ‘गोर्खा वारियर’को ग्राण्ड प्रिमियरमा पूर्व प्रधानमन्त्री तथा नेकपा एमालेका अध्यक्ष केपी शर्मा ओली पुगेका छन् । अध्यक्ष ओलीसँगै संस्कृति पर्यटन तथा नागरिक उड्डयनमन्त्री सुदन किराँती पनि प्रिमियरमा पुगेका छन् ।

चलचित्रकर्मी, चलचित्र पत्रकार तथा बिभिन्न क्षेत्रका प्रतिष्ठित ब्यक्तित्वहरुको बाक्लो उपस्थितिका बिच आयोजित रेड कार्पेटमा प्रिमियरमा सहभागी हुँदा खुसी लागेको अध्यक्ष ओलीले जनाएका छन् । उनले सम्भवतः पहिलो पटक रेड कार्पेटमा सहभागी भएको पनि जनाएका छन् ।

मिलन चाम्सको निर्देशन रहेको चलचित्रको प्रिमियर यतिबेला राजधानीको बिग मुभिजमा भइरहेको छ । जहाँ चर्चित सेलिब्रेटीहरुको बाक्लो उपस्थिति छ । यसअघि प्रमुख अतिथीका रुपमा उपराष्ट्रपति प्रिमियरमा सहभागी हुने जनाइएको थियो । यद्यपी उपराष्ट्रिपतिको आगमन देखिएन । 

चलचित्रमा रितेश चाम्स, विजय लामा, रेविका गुरुङ, सारा राई, रियर राई, शिशिर वाङ्देल, कविता आले, सुरज तमु, सुमीन गुरुङ, भुवन सिंह राईलगायत कलाकारको अभिनय रहेको छ ।

लन्डन सिनेआई प्रोडक्सन र चाम्स इन्टरटेन्मेन्टको सहकार्यमा निर्माण भएको चलचित्रको निर्मातामा सुस्मिता वाइवा, सुमन राई छन् । यस्तै कार्यकारी निर्मातामा प्रशान्त थापा र राजेन्द्र घिमिरे हुन् । चलचित्रमा सन् १९४९ मा ‘मलाय इमर्जेन्सी जंगल वार’ मा गोर्खाली सैनिकको साहसिक युद्धकथालाई प्रस्तुत गरिएको छ। फागुन ११ गतेदेखि प्रदर्शन हुने चलचित्र नेपाली, हिन्दी र अंग्रेजी भाषामा निर्माण गरिएको छ ।