चलचित्र ‘पशुपति प्रसाद २ः भष्मे डन’ कार्तिक ४ गतेबाट विश्वभर एकसाथ रिलिज हुँदैछ । निर्देशक दीपेन्द्र के खनालको निर्देशन रहेको चलचित्र यतिबेला चर्चामा छ ।

नेपालमा मात्र नभएर विश्वका विभिन्न देशमा समेत चलचित्रप्रति दर्शक प्रतिक्षा देखिएको छ । चलचित्र ‘पशुपति प्रसाद’को सिक्वेल भएकोले पनि यसको हाइप बढीरहदा केही देशहरुमा रिलिजभन्दा एक महिना अगाडी नै अग्रीम टिकट बुकिङ खुलेको छ । अष्ट्रेलिया, अमेरिका, जापान, पोर्चुगललगायत विभिन्न देशमा चलचित्रको अग्रीम टिकट बुकिङ खुल्ला भएको हो ।

चलचित्र ‘पशुपति प्रसाद २ः भष्मे डन’ प्रति देखिएको यो क्रेजले नेपालमा मात्र नभएर विदेशी बजारमा समेत बम्पर ओपनिङ गर्ने संकेत देखिएको छ । यसैबिच मेलबर्न प्रिमियरको तालिका समेत सार्वजनिक भइसकेको छ । मेलर्वनको चाइना टाउनमा अक्टोबर २३ मा चलचित्रको प्रिमियर हुँदैछ । यस्तै, २५ अक्टोबर, ३० अक्टोबर र ५ नोभेम्बरका लागिसमेत अग्रीम टिकट बुकिङ खुलिसेको छ । यता जापानका लागि पनि अग्रीम टिकट बुकिङ खुल्ला गरिएको छ । जापानमा अक्टोबर २७ मा केयोटो र ओसाकामा चलचित्र रिलिज हुनेछ भने अक्टोबर ३० मा कोबेमा रिलिज हुने पक्का भएको हो ।

युरोपको बेल्जियम लगायतका देशमा पनि चलचित्रले आक्रामक सुरुवात गर्ने देखिएको छ । अक्टोबर २१ बाट नै बेल्जियमका ५ वटा शहरमा चलचित्रको शो सुरु हुँदैछ । अक्टोबर २३ तारिखसम्मका लागि बेल्जियममा शो खुलिसकेको छ । ओभरसिज वितरकले चलचित्रको चाँडै अमेरिका, क्यानडा, युरोपका अन्य देश र मिडिल इष्ट लगायतका क्षेत्रमा पनि अग्रीम टिकट बुकिङ खोल्ने तयारी भइरहेको जानकारी दिएका छन् ।

‘पशुपति प्रसाद’को मृत्यु पश्चात पशुपति क्षेत्रमा आफ्नो अस्तित्व स्थापित गर्न संघर्षरत ‘भष्मे डन’को जीवनमा एउटा रोमाञ्चक पात्रको प्रवेशपछि सुरु भएको परिचय र आत्मसम्मानको लागि गर्ने शक्ति संघर्षको कथामा चलचित्र निर्माण गरिएको हो ।

चलचित्रमा विपिन कार्की, स्वस्तिमा खड्का, सौगात मल्ल, रविन्द्र सिंह बानियाँ, माओत्से गुरुङ, प्रकास घिमिरे, लोकेन्द्र लेखक, मिस्श्री थापा, सजन थापा मगर, विभु पौडेल, प्रकाश दाहालको पनि अभिनय रहेको छ भने अभिनेता तथा निर्माता खगेन्द्र लामिछाने र अभिनेत्री बर्षा सिवाकोटी पनि विशेष भुमिकामा देखिनेछन् ।