‘एक्टर’ सँगको सहमति पछि ‘एक्टरः टेक वान’ भोलिदेखि प्रदर्शन हुने

माघ ४ गतेबाट प्रदर्शनमा आएको चलचित्र ‘एक्टर’का निर्मातासँग सहमति भएपछि चलचित्र ‘एक्टरः टेक वान’ शुक्रबारबाट प्रदर्शनमा आउने भएको छ । बिहिबार दुबै चलचित्रका निर्माता बिच ‘एक्टर’ निर्माताले काठमाडौं जिल्ला अदालतमा दायर गरेको मुद्धा अदालत खुले लगत्तै फिर्ता लिने र ‘एक्टरः टेक वान’लाई आजबाटै निर्वाध रुपमा प्रदर्शन गर्न दिने सहमति भएको थियो । नाम मिलेको विषयमा ‘एक्टर’ निर्माताले मुद्धा हालेपछि अदालतको आदेशमा  ‘एक्टरः टेक वान’को पूर्वनिर्धारित प्रदर्शन रोकिएको थियो ।

सहमति जुटेपछि शुक्रबारबाट चलचित्र नियमित प्रदर्शन हुने भएको छ । बिहीबार पत्रकार सम्मेलन गर्दै निर्माताले यसबारेमा जानकारी गराए । वितरक कम्पनी डिसीएनले शुक्रबारबाट चलचित्र चलाउन आग्रह गर्दै हलहरुलाई इमेल पठाएको छ । यसपछि देशको सबैभन्दा ठूलो मल्टीप्लेक्स चेन क्यूएफएक्ससहितका हलले बुकिङ खुलाएका छन् । चलचित्र विकास बोर्डले पनि नेपाल चलचित्र संघलाई चलचित्रको रिलिजमा सहजीकरण गरिदिनका लागि पत्र पठाएको जनाइएको छ ।

राजन भुसालको निर्देशन रहेको चलचित्रमा प्रदीप खड्का, आना शर्मा, दिव्या रायमाझी, राजबल्लभ कोइराला, निश्चल बस्नेत लगायतको अभिनय छ । चलचित्रको स्क्रिप्ट आकाश बराल र राजन भुसालले लेखेका हुन् । अधृत फिल्म्स् र अ मोती फिल्मको संयुक्त प्रस्तुति रहेको यो चलचित्रमा निर्माता थमन कुमार भण्डारी, क्रियटिभ प्रोड्युसर मोती कार्की र सहनिर्माता अनीश भुसाल रहेका छन् ।