चितवन, बुटवल र पोखरा पुगे ‘बगान’का कलाकार

असार २९ गते देशभर रिलिज हुने नेपाली चलचित्र ‘बगान’को टोली चितवन, बुटवल र पोखरा पुगेको छ । अभिनेता तथा निर्देशक सरोज खनालसहित अभिनेत्री करिश्मा मानन्धर, नव अभिनेत्री प्रमिला कार्की र निर्माता तथा गीतकार सुरेश वाग्लेको टोली चलचित्र प्रचारका लागि उक्त शहरमा पुगेको हो ।

नेपाली चलचित्र प्रदर्शन हुने नेपालका हरेक कुनाकाप्चा पुग्ने इच्छा भएतापनि समय अभावका कारण सम्भव नभएको निर्देशक तथा अभिनेता खनालले बताए । उपत्यका बाहिर भएका पत्रकार सम्मेलनमा ‘बगान’को बिषयवस्तु र हेर्नुपर्ने कारणहरूबारे चर्चा भएका छन् । पत्रकार भेटघाट कार्यक्रमहरुमा निर्देशक खनालले हरेक घरका महिलाको दुःख, समस्या र त्यसको समाधान सहितको चलचित्र रहेको बताए । अभिनेत्री करिश्मा मानन्धरले ‘बगान’ले नेपाली चलचित्र क्षेत्रमा क्रान्ति गर्ने बताइन् । नव अभिनेत्री प्रमिला कार्कीले खनाल र मानन्धरसँग जोडिएर काम गर्न पाउँदा धेरै सिक्ने अवसर मिलेको र ‘बगान’ आफ्नो लागि विश्वविद्यालय सावित भएको उल्लेख गरिन् ।

काठमाडौँ बाहिरका दर्शक र सञ्चारकर्मीसँग प्रत्यक्ष भेटेर साक्षात्कार गर्ने उद्देश्यले प्रदर्शनकै सातामा भ्रमण गरेको निर्माता सुरेश वाग्लेले बताए । उपत्यका बाहिरका पत्रकार भेटघाटमा एकल आमाले निशुल्क हेर्न पाउने बिषयमा पनि चर्चा भएको छ । यो चलचित्रले देशभरनै एकल आमाहरूलाई निशुल्क चलचित्र देखाउने घोषणा गरिसकेको छ । यसको लागि चलचित्र हलमा सरकारले जारी गरेको एकल आमाको परिचयपत्र देखाउनुपर्नेछ ।

चलचित्रमा सरोज खनाल, करिश्मा मानन्धर, आकाश श्रेष्ठ, नव अभिनेत्री प्रमिला कार्कीसँगै नीर शाह, बसुन्धरा भुषाल, मिथिला शर्मा लगायतको अभिनय रहेको छ ।