नेपाल आइडलका बिक्रम बरालले गाउने भए ‘प्रसाद’को गीत

लेन्सनेपाल २०७५ मंसिर १

मंसिर २१ गतेबाट प्रदर्शनमा आउने प्रतिक्षित चलचित्र ‘प्रसाद’को तेस्रो गीत ‘नेपाल आइडल सिजन २’का प्रतिस्पर्धी विक्रम बरालले गाउँने भएका छन् । चलचित्रमा समावेश दुई गीत ‘बनकी चरी’ र ‘लै लै’ले दर्शकबाट उत्कष्ट प्रतिक्रिया पाइरहेका बेला निर्माण टिमले अर्को गीत विक्रम बरालको स्वरमा रेर्कड गराउने भएको छ ।

नेपाल आइडलका प्रतिष्पर्धी मध्ये निकै प्रसंसा बटुलिरहेका पोखराका बिक्रम बराललाई उपहार स्वरुप चलचित्रको गीत गाउने अवसर प्रदान गरिएको निर्माण टिमले जनाएको छ । नेपाल आइडलको मञ्चमा पुगेका निर्माता सुभाष थापाले जसले आफुहरुको मन जितेको छ त्यो प्रतिष्पर्धी मध्ये एकलाई व्यवसायिक गायनको शुरुवात गराउने उद्घोष गरेका थिए । सँगै रहेका निर्देशक दिनेश राउतले आइडलका सबै प्रतिष्पर्धी उत्कृष्ट रहेपनि आफ्नो गीतमा बिक्रमको स्वर फिट हुने भएकोले उनलाई छानेको बताएका छन् ।

चलचित्रका सबै गीतमा सुवास भुषालको संगीत छ । सुवास थापाको निर्माण रहेको चलचित्रमा सुशिल पौडेलको लेखन, राजेश श्रेष्ठको छायाँकन र लोकेश बज्राचार्यको सम्पादन रहेको छ । चलचित्रमा विपिन कार्की, नम्रता श्रेष्ठ, निश्चल बस्नेत, बसुन्धरा भुषाललगायतका कलाकारको अभिनय रहेको छ ।

नेपाल आइडलसँग सहकार्य गरेको चलचित्र प्रसाद आइडलको मुभि पार्टनर रहेको छ ।