‘च च हुई’मा रोमान्टिक आर्यन र मिरुना

लेन्सनेपाल २०७६ भाद्र ४
‘च च हुई’मा रोमान्टिक आर्यन र मिरुना

आर्यन सिग्देल र मिरुना मगरका लागि चलचित्र ‘च च हुई’ आशाको पर्खाइ बनिरहेको छ । मङ्सिर ६ गते प्रदर्शन हुने चलचित्रमा आर्यन र मिरुना पहिलो पटक एकसाथ देखिदैछन् ।

साम्तेन भुटियाले निर्देशन गरेको चलचित्र रोमान्टिक कमेडी जनराको हो । निर्माण टिमले चलचित्रका केही तस्विरहरु सार्वजनिक समेत गरेको छ । जहाँ आर्यन र मिरुनाको रोमान्टिक अवतार देखाइएको छ । विहिबार ‘सिल्की सिल्की बाल’ बोलको गीत सार्वजनिक गर्ने तयारी गरिरहेको निर्माण टिमले सोही गीतका केही तस्विरहरु सार्वजनिक गरेको हो ।

मुस्ताङ्गको चुसाङ्गमा छायाँकन गरिएको गीतको सार्वजनिक तस्वीरमा आर्यन र मिरुनाको केमेष्ट्री गज्जबकै देखिएको छ । झन्डै एक साता लगाएर छायाँकन गरिएको गीतको कोरियोग्राफी शिशिर खातीले गरेका हुन् । गीतमा राजनराज शिवाकोटी र मेलिना राईको स्वर रहेको छ भने राजनकै संगीत रहेको छ । गीतमा राजनसंगै अमृत घोले लामा र श्याम लामिछानेको शब्द रहेको छ ।

एजीएल इन्टरटेनमेन्टको ब्यानरमा अमृत घोले लामाले निर्माण गरेको चलचित्रलाई साम्तेन भुटियाले निर्देशन गरेका हुन् ।

चलचित्रमा साम्तेनकै सम्पादन, सुशन प्रजापतिको छायाँकन, सिजन दाहाल र सन्देश अर्यालको पटकथा, राजनराज शिवाकोटी, सुरज शाही ठकुरी र रोशन थापाको संगीत, श्री श्रेष्ठको द्वन्द्व, शिशिर खातीको कोरियोग्राफी र सुजिल कर्माचार्यको ब्याकग्राउण्ड स्कोर रहेको छ ।