पोखराबाट ‘चित्रा’को छायाँकन शुरु

लेन्सनेपाल २०८० भाद्र ३०

चलचित्र ‘चित्रा’को छायाँकन शुरु भएको छ । घनश्याम लामिछानेको निर्देशन रहने चलचित्रको शुक्रबारदेखि पोखरामा छायाँकन शुरु भएको हो । छायाँकन शुरु गरेसँगै चलचित्र माघे सङ्क्रान्तिलाई लक्षित गरी पुस २७ गते रिलिज हुने जनाइएको छ ।

एक रिटायर्ड बाबु र छोरीको कथालाई प्रस्तुत गर्ने चलचित्रमा अर्पण थापा, प्रमोद अग्रहरी, मेनुका प्रधान, सन्तोष अधिकारी, शुभेच्छा खड्का, प्रकाश घिमिरेलगायतका कलाकारको अभिनय रहनेछ ।

सन्तोष अधिकारी फिल्मस्को व्यानर तथा अस्याप इन्टरटेनमेन्ट नेपाल र अस्ट्रेलियाको निर्माणमा बन्ने चलचित्र पोखरा र घाचोकमा छायांकन हुनेछ । आशिष थापा मगर निर्माता र सन्तोष अधिकारी कार्यकारी निर्माता रहने चलचित्रमा अजय अधिकारीको कथा, मनिष गौतमको पटकथा तथा संवाद, महेश पौडेलको छायांकन र राजन राज सिवाकोटीको संगीत रहनेछ ।