चलचित्र ‘दान्भी’को ट्रेलर सार्वजनिक

असार ७ गतेबाट रिलिज हुने चलचित्र ‘दान्भी’को ट्रेलर सार्वजनिक भएको छ । बिहीबार राजधानीमा एक कार्यक्रमको आयोजना गर्दै ट्रेलर सार्वजनिक गरिएको हो ।

ट्रेलरमा नायिका पूजा शर्माको दमदार एक्सनलाई स्थान दिइएको छ । चलचित्रका नवनायक कुन्साङ बोमजोमसँग पुजाको प्रेमलाई पनि ट्रेलरमा देख्न सकिन्छ । ट्रेलर हेर्दा कुन्साङको हत्या पछि उनको हत्याको बदला लिन पुजालाई एक्सन रुपमा प्रस्तुत गरिएको बुझ्न सकिन्छ । ट्रेलरमा पुजालाई ‘लेडी टाइगर’का रुपमा चित्रण गरिएको छ ।

कार्यक्रममा नायिका पुजाले चलचित्रको टिजर र एक्सन सिक्वेन्सको तस्वीर सार्वजनिक भएपछि सञ्चारमाध्यममा आफूलाई ट्रोल बनाइएकोमा गुनासो गरिन् । ‘मेरो एक्सनलाई देखावटी भनेर समाचार पनि आयो । तर मैले चलचित्रका लागि कतिसम्म एक्सन दृश्य दिएको छु भन्ने कुरा दर्शकले चलचित्र हेरेपछि थाहा पाउनुहुनेछ’, उनले भनिन् ।

पुजाले आफूले ट्रेलर हेरिरहँदा ती दृश्य कसरी गरें भन्ने आफूलाई लागेको बताइन् । ‘अब म अरुको आलोचना सुन्नु भन्दा कामले नै जितेर देखाउँछु भन्ने अठोटमा छु । हिरोइनले पनि एक्सन सिक्वेन्स गर्न सक्छन् भन्ने दान्भीमा देखाएको छु’, उनले भनिन् ।

नवनायक कुन्साङले दर्शकले ‘दान्भी’मा नयाँ एक्सन जनरा पाउने बताए । अर्का नायक किरण श्रेष्ठले एक्सन जनरा मनपर्ने दर्शकका लागि ‘दान्भी’ उपयुक्त चलचित्र भएको दाबी गरे ।

चलचित्रका द्वन्द्व निर्देशक श्री श्रेष्ठले पुजाको टाइमिङ र उनको मेहनतले ‘दान्भी’मा एक्सन गर्न सजिलो भएको बताए । निर्देशक रुपेश तामाङले चलचित्र राम्रो बनेकोमा आफू ढुक्क रहेको बताए ।

नेपाल र भारतका विभिन्न स्थानमा खिचिएको चलचित्रमा विशाल पहाडी, राजाराम पौडेललगायतका कलाकारको पनि अभिनय छ । चलचित्रमा पवन राना मगर कार्यकारी निर्माता र देव मगर तथा अनुप गडाल निर्माता छन् । चलचित्रमा कमला लिम्बु, पन्चबहादुर तामाङ र आदर्श पौडेल सह–निर्माता छन् ।

चलचित्रमा सन्जोग कुँवर रानाको पटकथा तथा संवाद, रविना थापा मगरको कथा, हरिप्रसाद घलेको डीओपी, बन्दे प्रसादको सम्पादन, श्री श्रेष्ठको एक्सन, कविराज गहतराज र रामजी लामिछानेको कोरियोग्राफी छ ।