‘डिग्री माइला’ प्रदर्शन, प्रिमियरमा सुखद प्रतिक्रिया

नयाँवर्षको अवसर पारी सर्वजनिक प्रदर्शनमा आएको चलचित्र ‘डिग्री माइला’ले बिहीबार सम्पन्न प्रिमियरमा प्रशंसा बटुलेको छ । रामबाबु गुरुङको निर्देशनमा बनेको चलचित्रले डिग्री हासिल हुनुको अहमताले भरिएको पात्र र समाजले ऊसँग राखेको अपेक्षाबीचको घर्षणको कथा पेस गर्छ ।

प्रिमियरमा चलचित्र हेर्न चलचित्रकर्मी, पत्रकार तथा बिभिन्न दलका नेता समेत बिग मुभीज पुगेका थिए । प्रिमियरमा बिग मुभिजका तीनवटै हल भरिभराउ थिए । प्रिमियर पछि ‘जारी’मा दयाहाङ राईको जोडी बनेकी अभिनेत्री मिरुना मगरले चलचित्र राम्रो बनेको प्रतिक्रिया दिइन् । ‘एकदमै राम्रो लाग्यो मलाई। सुरुमा हाँसिराख्दा र रमाइलो हुँदाहुँदै अन्त्यसम्म आइपुग्दा जुन एउटा नेपाली युवाहरुले सामना गरिरहनुपरेको कुरा जुन देखाइएको छ, त्यसले एकदमै मन छोयो’, उनले भनिन् । उनले अभिनेत्री आँचल शर्माको प्रशंसा गरिन् । ‘आँचलजीको काम एकदमै रिफाइन लाग्यो । पूरा टिम हेर्दा आफ्नै लाग्यो तर आफूलाई मिसचाँहि गरिन’, उनले थपिन् ।

मिरुनासँगै फ्रेममा रहेकी अभिनेत्री लुनिभा तुलाधरले ‘डिग्री माइला’ टोलीका लागि सम्मान व्यक्त गरिन् । उनले हसाउँन माहिर भन्दै निर्देशक रामबाबु गुरुङको प्रशंसा गरिन् । ‘उहाँले राम्रोराम्रो कलाकारहरुलाई व्यवस्थापन गरेर एक ठाउँ राखेर निर्देशन गर्नुहुन्छ। उहाँसँग त्यो कला छ। एउटा निर्देशक राम्रो व्यवस्थापक हुनुपर्छ। यसका लागि मैले सम्मान गर्नैपर्छ’, उनले भनिन् । उनले नयाँ वर्षमा हेर्नलायक चलचित्रमा भएको जनाउँदै दर्शकहरुले आफूलाई जोड्नसक्ने बताइन् । यसैगरी ‘लुट’ अभिनेत्री श्रृजना सुब्बाले चलचित्रको अन्तिम दृश्यले गर्दा आफूलाई मनमा केही नबलौं जस्तो लागेको बताइन् । ‘एकदमै मन कस्तो भारी भइराख्यो । रामबाबुको राम्रो पक्षचाँहि एकदमै गहन कुराहरुलाई रमाइलो तरिकाले प्रस्तुत गर्दै एकदमै सजिलो तरिकाले बुझाउने तरिका एकदमै राम्रो छ। कबड्डीमा जुनप्रकारको थियो, त्यो हिट पनि भयो । योचाँहि मलाई झन् एकदमै मनपर्यो । उहाँ काममा बढोत्तरी भइरहेको पाए’, उनले भनिन् । यस्तै उनले दयाको काम र भूमिकाको तारिफ गरिन् । ‘म दयालाई यस्तै क्यारेक्टरमा हेर्न चाहन्थे । उसको यस्तो पात्रहरु भइदियोस जस्तो लाग्थ्यो । अरु सबैको काम मनपर्यो । मलाई एकछिन नबोलुँम नबोलूँम जस्तो बनायो ।’ यसैगरी चलचित्रका शीर्ष पात्र दयाहाङ पनि खुशी देखिए । उनले पूरै चलचित्र आफूले पनि पहिलोपटक हेरेको बताउँदै सबै कलाकारको अभिनय मनपरेको जनाए । ‘मैले आफूलाई एकदमै इमानदार भएर हेर्ने कोशिस गरें । हामीले जो मेहेनत गरेको थियौं, त्योचाँहि छर्लगै देखिन्छ’, उनले भने । दयाले ‘डिग्री माइला’को कथा ‘कबड्डी’ सिरिजभन्दा धेरै अगाडिको योजना भएको स्मरण गर्दै ‘कबड्डी’को प्रभावबाट निर्देशक रामबाबु पर रहेको र कथा वाचन फरक भएको बताए । अभिनेत्री आँचलले आफूलाई चलचित्र मनपरेको बताइन् । दयाले अभिनेत्रीका हिसाबले आँचलको तारिफ गरें । ‘मचाँहि खुशी छु, पहिलोपटक स्क्रिन साझा गरिरहँदाचाँहि मैले उसको अभिनयमा परिपक्वता छर्लगैं देखिन्छ’, दयाले भने । यस्तै एमाले नेता एवम् संघीय सासंद रघुजी पन्तले समंग्रमा चलचित्रमा मनोरञ्जक रहेको र चलचित्रले सन्देश पनि बोकेकाले आफूलाई मनपरेको बताए ।

‘शैक्षिक संस्थाहरुमा कस्तो ढंगले राजनीति भइरहेको छ, कसरी बिग्रीरहेको छ भन्ने कुरालाई मनोरञ्जक ढंगले देखाएको छ । टिपिकल रामबाबुको चलचित्र हो । उनको स्टाइल हो ।’, उनले भने । यसैगरी उनले डिग्री माइलाहरु देशमा धेरै भएको भन्दै उनीहरुलाई देश छोडेर नजानसमेत आग्रह गरे । यसैगरी उनीहरुका अलावा प्रिमियरमा अभिनेत्री प्रियंका कार्की आफ्ना अभिनेता पति आयुष्मान देशराज श्रेष्ठ र आमासँग पुगेकी थिइन् ।

उनका अलावा निर्मात्री निर्देशक एवं कलाकार दीपाश्री निरौला, अभिनेता निर्मल शर्मा, कर्मा, नरेन खड्का, हास्य कलाकारहरू सुन्दर भट्टराई, विल्सन विक्रम राई लगायतका थिए । उनीहरु सबैले चलचित्रको विषयवस्तु र कलाकार मनपरेको प्रतिक्रिया दिएका थिए ।