चलचित्र बिकास बोर्डको अध्यक्षमा दिनेश डिसी नियुक्त

लेन्सनेपाल २०८१ भाद्र १३

चलचित्र बिकास बोर्डको अध्यक्षमा निर्देशक तथा कलाकार दिनेशराज दाहाल (डिसी) नियुक्त भएका छन् । बिहीबार बसेको मन्त्रिपरिषद्‌ बैठकले उनलाई बोर्ड अध्यक्षमा नियुक्त गरेको हो । नेपाली चलचित्र क्षेत्रको सर्वोच्च निकाय चलचित्र विकास बोर्डको अध्यक्षमा २ वर्षका लागि डिसीलाई नियक्त गरिएको हो ।

टेलिसिरियल हुँदै सन् १९९७ मा रिलिज भएको चलचित्र ‘सुनचाँदी’बाट डिसीले फिचर फिल्ममा अभिनय यात्रा सुरु गरेका थिए । तीन दर्जन भन्दा बढी चलचित्रमा अभिनय गरेका डिसी चर्चित निर्देशक समेत हुन् । सन् २००६ मा रिलिज भएको चलचित्र ‘सावधान’बाट निर्देशन यात्रा सुरु गरेका उनले ‘दाईको ससुराली’, ‘मायाज् बार’, ‘६ एकान ६’ र ‘फूलै फूलको मौसम तिमीलाई’को निर्देशन गरेका छन् ।

चलचित्र कलाकार संघको सल्लाहकार र चलचित्र निर्देशक समाजका पूर्व अध्यक्ष समेत रहेका डिसी एमाले निकट जनपक्षीय चलचित्रकर्मी संघको अध्यक्ष हुन् । आवाजको साथी उपमाले चर्चित रहेका डिसी टेलिभिजन, रेडियो कार्यक्रम र स्टेज कार्यक्रम सञ्चालनमा निकै नै सफल र चर्चित छन् ।