‘फर्की फर्की’ हेरेपछि निश्चलले गरे तारिफ, अग्रिम बुकिङ खुल्ला, देशभर उच्च शोज

लेन्सनेपाल २०८१ जेष्ठ ८

निर्देशक निश्चल बस्नेतले रिलिजको संघारमा रहेको चलचित्र ‘फर्की फर्की’ प्रति सकारात्मक प्रतिक्रिया दिएका छन् । उनले आफूले चलचित्र हेरेको भन्दै नायक अनमोल केसी, निर्देशक सुयोग गुरुङ, निर्माता रोहित अधिकारी र छायांकार नरेन्द्र मैनालीको तारिफ गरेका छन् ।

‘फर्की फर्की’ हेरियो । मज्जा आयो चलचित्र हेरेर । रमाइलो टाइम लुप । सुयोग गुरुङ, कडा छ निर्देशन । नरेन्द्र मैनाली, सिनेम्याटोग्राफी बबाल छ । अनमोलको अहिलेसम्मकै उत्कृष्ट अभिनय । रोहित अधिकारी बोरा छ नि पैसा राख्नलाई,’ सोमबार साँझ निश्चलले फेसबुकमा लेखेका छन् ।

अनमोल केसी र जसिता गुरुङ स्टारर चलचित्र बिहीबारबाट प्रदर्शनमा आउँदैछ । चलचित्रको अग्रिम बुकिङ खुलिसकेको छ । चलचित्रलाई क्युएफएक्स चेनले ६१ शो, आईएनआईमा १५ र वान सिनेमाले ९ शो दिएको छ ।

रोहित अधिकारीको निर्माण र सुयोग गुरुङको निर्देशन रहेको चलचित्रमा अनमोल र जसितासँगै रवि काफ्ले, समृद्धि अर्याल, निर्मल शर्मा, सलोन बस्नेतलगायतका कलाकारको अभिनय छ ।