फागुन १ देखि बन्द हुँदै गोपीकृष्ण हल

लेन्सनेपाल २०८० माघ २६

काठमाडौंको चाबहिलस्थित गोपीकृष्ण हल फागुन १ गतेदेखि बन्द हुने भएको छ । गोपीकृष्ण मुभिजका प्रबन्ध निर्देशक नीरक पौडेलले एक विज्ञप्ति जारी गर्दै कोरोनाको समयदेखि बेहोर्नुपरेको आर्थिक घाटाका कारण हल बन्द गर्ने निर्णयमा पुगेको जनाएका छन् ।

२०५२ सालमा स्थापना भएको हलले चलचित्र प्रदर्शनमा गर्विलो इतिहास बोकेको छ । कोरोना अघि सम्म गोपीकृष्ण हलबाट नेपाली निर्माताले सबैभन्दा धेरै सेयर पाउने गरेका थिए । गोपीकृष्णको शुक्रबार र शनिबारको कमाईबाट चलचित्र हिट र फ्लप निर्धारण हुन्थ्यो । सातवटा हल सञ्चालनमा रहँदा गोपीकृष्ण कलाकारको क्रेज देखाउने थलो समेत बनेको थियो ।

सातवटा हल सञ्चालनमा रहेको गोपीकृष्णको मुख्य हल संरचना कोरोना पछि भत्काइएको थियो । यस्तै ‘ओमः’, ‘नमः’ र ‘शिवायः’लाई रातो, हरियो र निलो (आरजिबी) रंगको थिममा सञ्‍चालनमा ल्याइएको थियो ।