Movie News

‘हल्कारा’को ट्रेलर रिलिज

लेन्सनेपाल २०७९ चैत्र ३०

चलचित्र ‘हल्कारा’को ट्रेलर रिलिज गरिएको छ । बिहीबार काठमाडौँमा पत्रकार सम्मेलनको आयोजना गरी ट्रेलर रिलिज गरिएको हो ।

चलचित्रको ट्रेलरमा हुलाक सेवाको सरकारी जागिरमा रहेको युवकको कथा देख्न सकिन्छ । ट्रेलरले रोजगारीको लागि विदेशिएको पुरुष र उसलाई पर्खेर बस्ने एक नारीको कथा समेत प्रस्तुत गरेको छ । गाउँमा चिठ्ठी पुऱ्याउने एक हल्काराको माध्यमबाट वैदेशिक रोजगारीले नेपाली समाजमा पारेको प्रभावलाई ट्रेलरमा देखाउने कोसिस गरिएको छ । चलचित्रमा अभिनेता त्रिपाठीले हल्कारा अर्थात् हुलाकीको चरित्र निर्वाह गरेका छन् ।

चलचित्रलाई कालीपार स्टुडियोले निर्माण गरेको हो भने आइसफल प्रोडक्सनको सहकार्य रहेको छ । चलचित्रले विभिन्न चलचित्र महोत्सवहरुमा सहभागिता जनाई केही अवार्डहरु समेत प्राप्त गरिसकेको छ ।

महेश त्रिपाठी र बिनिता थापामगरको मुख्य भूमिका रहेको चलचित्रका लेखक, निर्देशक तथा सम्पादक विक्रम सापकोटा हुन् ।