अमेरिकामा छायाँकन गरियो ‘हिउँको गीत’, वर्षा र जोयसको मुख्य भूमिका

लेन्सनेपाल २०८१ माघ २

वर्षा राउत र जोयस पाण्डेको मुख्य भूमिका रहेको चलचित्र ‘हिउँको गीत’को छायांकन सम्पन्न भएको छ । ओहायो राज्यको क्लिभल्याण्ड शहरमा अधिकांश छायांकन गरिएको चलचित्रको अन्तिम दृष्य पेन्सलभेनिया राज्यको पिट्सबर्ग शहरमा छायाँकन गरिएको जनाइएको छ ।

विमल सुवेदीले निर्देशन गरेको चलचित्रमा सुबेदी र कलाकार पाण्डेको लेखन रहेको छ । नेपाली भाषी भुटानी तथा नेपाली आप्रवासीको कथा समेटिएको चलचित्रमा भुटान, नेपाल र अमेरिकामा जन्मे हुर्केका फरक–फरक पुस्ताका सपना, आकांक्षा र संघर्षको कथा प्रस्तुत गरिएको निर्माण समूहले जनाएको छ ।

समुन्द्र राज घिमिरे निर्माता रहेको चलचित्रमा वर्षा र जोयशसँगै पूजा चन्द, आकाश खतिवडा, इश्वर कर्मचार्य, थोमस किथ स्कट, केदार उप्रेती, आरबी खड्का, अर्जुन रसाइली, समीर रेग्मी, आयुष भट्टराई, नवीन खनाल, जोशिका रामदाम लगायतको अभिनय रहेको छ ।

चलचित्रमा निशान घिमिरेको सम्पादन, शंकर बिसी र कौशिला खनाल कर्मचार्यको नृत्य निर्देशन, कौशिला खनाल कर्मचार्य, आरबी खड्का, डम्बर नेपाली, प्रतिमा श्रेष्ठको गीत रचना तथा कालिप्रसाद बास्कोटा, मदन गोपाल, डम्बर नेपाली र अर्जुन रसाइलीको संगीत तथा गायन रहेको छ ।