चलचित्र ‘ह्रस्व दीर्घ’को सुखद सुरुवात

लेन्सनेपाल २०८१ कार्तिक ३०

चलचित्र ‘ह्रस्व दीर्घ’ले सुखद सुरुवात गरेको छ । प्रदर्शनको पहिलो दिन शुक्रबार मध्यान्न सम्म चलचित्रको ब्यापार उत्साहजनक देखिन्छ । सिंगल स्क्रिनदेखि मल्टीप्लेक्ससम्म अधिकांश शो हाउसफूल देखिएका छन् ।

चलचित्रले देशभर एक सय ५० बढि शो पाएको छ । धेरै शोहरुमा अग्रीम बुकिङ्ग सुखद देखिएको छ भने नेपाली चवलचित्रको ‘डोरसेल’ अझ राम्रो हुने भएकाले अन्य शोहरु पनि हाउसफूल हुन सक्ने सम्भावना उत्तिकै छ ।

चन्द पन्तले निर्देशन गरेको चलचित्रमा कलाकारको ‘लाइनअप’ बलियो छ । नेपालीदेखि दक्षिण भारतका नाम चलेका कलाकारहरुले अभिनय गरेका छन् । यसैले चलचित्रप्रति दर्शकमा चासो देखिन्छ । चलचित्रमा हरिहर अधिकारी, नीता ढुंगाना, ब्रह्मानन्दम, अली, कवीर दुहान सिंह, प्रदीप रावत, सुनिल वर्मा र प्रशान्त ताम्राकार, सञ्चीता लुईटेल, विपना थापा, सरोज खनाल, नरेन खड्का, गरिमा शर्मा, रवीन्द्र झा, आर्दश मिश्र, बुद्धि तामाङ र किरण केसीलगायतका कलाकारको अभिनय रहेको छ ।

नीता फिल्मस्को प्रस्तुतिमा निर्माण भएको चलचित्रका कार्यकारी निर्माता धनन्जय गलानी हुन् । अभिनेता हरिहर अधिकारीको कथा र प्रतीक पौडेल, निर्देशक पन्त र हरिहरको पटकथा तथा संवाद रहेको चलचित्रलाई बलिउडका चर्चित चलचित्रटोग्राफर कवीरलालले खिचेका हुन् ।