शनिबार पनि आक्रामक ‘कबड्डी ३’, हलमा ओइरिए दर्शक

लेन्सनेपाल २०७६ असोज ४

‘कबड्डी कबड्डी कबड्डी’ यस वर्षको सवैभन्दा बढी ओपनिङ व्यापार गर्ने चलचित्र बन्न सफल भएको छ । घरेलु बक्स अफिसमा शुक्रबार १ करोड ४७ लाख (वितरकका अनुसार) को व्यापार गरेको चलचित्रले शनिबार थप आक्रामक व्यापार गरेको छ ।

शनिबार विहानी र दिवाकालिन शोहरु हाउसफूल भएका छन् । राजधानी सहित देशभरका मल्टिप्लेक्सहरुमा चलचित्रको अकुपेन्सी लगभग शतप्रतिशत देखिएको छ । राजधानीका गोपीकृष्ण, अष्टनारायण लगायतका सिंगल थियटरहरुमा पनि चलचित्रले हाउसफूल व्यापार गरिरहेको छ । केही हलहरुमा दर्शकहरु टिकट नपाएर फर्केका छन् भने मल्टिप्लेक्समा अग्रिम बुकिङ आक्रामक नै छ । जसका कारण शनिबारको वक्स अफिस रिपोर्ट शुक्रबारको भन्दा अझ उत्साहजनक आउने पक्का छ ।

चलचित्रले राम्रो व्यापार गरिरहदा निर्माण पक्ष हलमा पुगेर दर्शकहरुलाई धन्यवाद भन्नमा व्यस्त छ । शनिबार बिहान राजधानीको गोपीकृष्ण हलमा पुगेर चलचित्रका निर्देशक रामबाबु गुरुङ, कलाकारहरु दयाहाङ राई, उपासना सिं ठकुरी, बुद्धी तामाङ, विल्सन बिक्रम राई लगायतको टोलिले दर्शकसँग खुशी साटेको छ । सो अवसरमा दर्शकहरुले चलचित्र आफुहरुलाई मन परेको प्रतिक्रिया दिएका छन् भने कलाकारसँग चलचित्रको गीत गाएर उत्साहज थपेका छन् । दर्शकको हौसलाले उत्साह थपिरहदा गोपीकृष्ण हल परिसरमै अभिनेत्री उपासनाको जन्मदिन समेत मनाइएको छ । शनिबार उपसनाको जन्मदिन परेकोले हल परिसरमै केक काटेर सेलेब्रेट गरिएको हो ।