‘कुस्ती’ निर्माणको घोषणा, धीरज र मिरुनाको मुख्य भूमिका रहने

लेन्सनेपाल २०८१ पौष १५

तमु ल्होसारको अवसर पारेर कलाकार बुद्धि तामाङको निर्माण रहने फिल्म ‘कुस्ती’ घोषणा गरिएको छ । अनिल योञ्जनको लेखन तथा निर्देशन रहने फिल्मको पोस्टरमा धीरज मगर र मिरुना मगर फिचर्ड छन् ।

लाइट ग्रीन र लाइट पिङ्कको प्रयोग गरिएको पोस्टरमा धीरज लाइट पिङ्क ड्रेसमा सोफाको एक भागमा बसेका छन् । मिरुना भने लाइट ग्रीन ड्रेसमा सोफाको अर्को भागमा बसेकी छन् । धीरज हँसिलो भावमा छन् । मिरुना निराश देखिन्छिन् । अलग स्वभावका दुई पात्रको प्रेमकथामा फिल्म बन्ने पोस्टरले संकेत गर्छ । फिल्ममा धीरज र मिरुनासँगै बुद्धि तामाङको पनि अभिनय रहने छ।

अनुषा सिनेमावुड पिक्चर्स प्रालीको व्यानरमा बन्ने फिल्म ‘कुस्ती’मा सम्बन्धमा रहेको एक जोडीको प्रेम कथा देखाइने निर्देशक योञ्जनले बताए । कलाकार बुद्धि तामाङले कथावस्तु र टिमका कारण आफू निर्माणमा आएको बताए । उनले भने, ‘म यसै क्षेत्रमा छु । यसपटक कथावस्तु मन पर्नुका साथै टिम अनुभवी रहेकाले निर्माताको रुपमा अगाडि आएको छु।’ फिल्म आउँदो वर्ष २०८२ को भाद्रमा प्रदर्शन हुनेछ।