‘पासवर्ड’ निर्माताको बलिउड चलचित्र ‘लैला मंजु’

लेन्सनेपाल २०७६ पौष २६

यसअघि चलचित्र ‘पासवर्ड’ निर्माण गरेको कम्पनी एबी इन्टरनेशनलले बलिउड चलचित्र निर्माण गरिरहेको छ । बलिउड चलचित्र ‘लैला मंजु’को छायाँकन शुरु भएको निर्माताद्वय अमित बस्नेत र अजित केआर थापाले जानकारी दिएका छन् ।

जनवरी २ देखि युकेमा छायाँकन भइरहेको चलचित्रलाई प्रेमराज सोनीले निर्देशन गरिरहेका छन् । चलचित्रमा फरिदा जलाल, शशांक व्यास, अभिमन्यु टोमर, नेहाल चुडास्मा, जेसी लिभर, लुलिया भन्तुर, महेश मंजेकर, जिम्मी शेर्गिल, रजित कपूर, निकी अनेजालगायतका कलाकारको अभिनय रहने छ ।

फरिदा बलिउडकी नाम चलेकी अभिनेत्री हुन् । झन्डै ५ दशक लामो अभिनय यात्रामा उनले २ सय बढी चलचित्रमा काम गरिसकेकी छन् । शशांक कलर्स टिभीको चर्चित सिरियल ‘बालिका बधु’मा जगदीश सिंहको भूमिकामा थिए । यस्तै अभिमन्युले केहि म्युजिक भिडियो र विज्ञापनमा काम गरिसकेका छन् । नेहा ‘मिस युनिभर्स इण्डिया – २०१८’को विजेता हुन् । भने, जोनी लिभरका छोरा जेसीले यसअघि ‘वार’ र ‘ए साली आशिकी’मा अभिनय गरिसकेका छन् ।

चलचित्र २०२० मै रिलिज हुनेछ । एबी इन्टरनेशनलसँग निर्माणमा डि।एन।ए पिक्चर्सले सहकार्य गरेको छ । एबी इन्टरनेशनलको नेपाली चलचित्र ‘सम्हालिन्छ कहिले मन’ प्रदर्शनको लागि तयार छ ।