बैशाख २३ मा ‘लक्का जवान’ प्रदर्शन हुने

लेन्सनेपाल २०७८ मंसिर २०

चलचित्र ‘लक्का जवान’को प्रदर्शन मिति तय गरिएको छ । चलचित्र आउँदो वर्षको बैशाख २३ गते प्रदर्शन गरिने भएको छ । यस अघि २०७६ चैत २१ गते प्रदर्शन हुने तय भइसकेको भएपनि कोरोना महामारीका कारण ११ गतेबाट नै देशभर लकडाउन भएकाले प्रदर्शन हुन सकेको थिएन ।

कलाकार शिवहरी पौडेलको निर्देशन रहेको चलचित्रमा प्रियंका कार्की, दिलीप रायमाझी, सलोन बस्नेत, वर्षा सिवाकोटी, किरण केसी, राजाराम पौडेल, शिवहरि पौडेल, सुशील पोखरेल, सुरेन्द्र केसी, जयनन्द लामा लगायतका कलाकारको अभिनय रहेको छ । कमेडी कथामा बनेको चलचित्रको गीत ‘यो होनी तरिका’ र ‘म त सक्दिन’ यस अघि सार्वजनिक भइसकेका छन् ।

किरण केसी कार्यकारी निर्माता रहेको चलचित्रमा अन्सुया श्रेष्ठ, शिवहरि पौडेल, राज केसी, सुरेन्द्र केसी र दीपेन्द्र खनियाँको लगानी रहेको छ ।

चलचित्रमा मित्र डी गुरुङको सम्पादन, बाबुल गिरीको संगीत, कविराज गहतराजको कोरियोग्राफी र पुरुषोत्तम प्रधानको छायाँकन रहेको छ । चलचित्रलाई एफडि कम्पनी र गोपाल काजी कायस्थले वितरण गर्नेछन् ।