‘माइतीघर’को शीर्षगीत संजीवनीको स्वर

लेन्सनेपाल २०८१ चैत्र ४

रोहित अधिकारीको निर्माण रहने चलचित्र ‘माइतीघर’को शीर्षगीत मुम्बईमा रेकर्ड गरिएको छ । चलचित्रमा सन् १९६६ डिसेम्बर १६ मा रिलिज भएको नीजि क्षेत्रको पहिलो चलचित्र ‘माइतीघर’कै शिर्ष गीत समावेश हुनेछ ।

‘वसन्त नै बस्न खोज्छ यहाँ’ बोलको गीतको नयाँ संस्करणमा बलिउडकी चर्चित पाश्र्वगायिका संजीवनीले स्वर दिएकी छिन । यो गीतको ओरिजिनल भर्सनमा सुप्रसिद्ध गायिका आशा भोसलेको स्वर थियो । गीतमा किरण खरेलको शब्द र जयदेवको संगीत यथावत रहने जनाइएको छ । गीतको नयाँ भर्सनलाई रिकेश गुरुङले एरेन्ज गरेका छन् ।

आइतबार मुम्बईस्थित नीरञ्जन स्टुडियोमा संजीवनीले गीत रेकर्ड गरेकी हुन् । गीत रेकर्ड पछि भिडियो सन्देश जारी गर्दै संजीवनीले यो गीत गाँउदा निकै आनन्द आएको जनाएकी छिन ।

यसअघि यही गीतलाई गायिका अञ्जु पन्तले पनि रि–रेकर्ड गर्दै आफ्नो एल्वम ‘कम्पन’ समावेश गरेकी थिइन ।