सर्दा सर्दै फागुन १४ मा पुग्यो चलचित्र ‘मायावी’

चलचित्र ‘मायावी’को प्रदर्शन मिति पुनः परिवर्तन गरिएको छ । दोस्रो पटक प्रदर्शन मिति परिवर्तन गर्दै चलचित्रको प्रदर्शन माहाशिवरात्रीको अवसर पारेर फागुन १४ गते हुने जनाइएको छ । आइतबार निर्माण टिमले पोस्टर सार्वजनिक गर्दै उक्त मिति घोषणा गरेको हो ।

शुरुमा तिहारको अवसर पारी कार्तिक १५ गतेका लागि प्रदर्शन मिति तोकिएको थियो । तर, मुख्य अभिनेता पल शाह अभिनित अर्को चलचित्र ‘रावायण’ बक्स अफिसमा असफल भएपछि त्यसको साइड इफेक्ट स्वरुप ‘मायावी’को प्रदर्शन मिति स्थगित भएको थियो । उक्तः समय निर्माण टिमले चलचित्रको रिलिज मिति पुष २६ गते तोकेको थियो । पटक पटक प्रदर्शन मिति परिवर्तन गर्ने क्रममा अब भने चलचित्रले फागुन १४ रोजेको हो ।

दीवाकर भट्टराईको निर्देशन रहेको चलचित्रको पोष्टरमा कलाकारहरु पल शाह र दीपिका प्रसाईं फिचर्ड छन् । प्रेम कथाको यो चलचित्रमा पल र दीपिका सँगै सुशील सिटौला, समिम खान, करिश्मा श्रेष्ठ, प्रशान्त ताम्राकार, लक्ष्मी गिरी, रवि डंगोल, राजाराम पौडेल, अंशु महर्जन, रमा प्रसाईंलगायतको अभिनय रहेको छ ।

निर्देशक भट्टराईकै लेखन रहेको चलचित्रमा राजु थापाको छायाँकन, शम्भुजित बास्कोटा र एसडी योगीको संगीत र राम अविरल र दयाराम पाण्डेको गीत रचना छ । क्रिएटिभ सिने आट्र्सको ब्यानरमा निर्माण भएको चलचित्रका निर्माता ध्रुव न्यौपाने, राज कटुवाल र चन्द्र पन्त हुन् । यस्तै चलचित्रको सह–निर्मातामा मञ्जु भण्डारी, राजु पराजुली र सुमित ओली रहेका छन् भने प्रविन भट्टराई र करण सिंह कार्यकारी निर्माता हुन् ।