डेनिलाले चुमिन मिसेस नेपाल वर्ल्ड २०२४ को ताज

शनिवार साँझ नेपाल प्रज्ञा प्रतिष्ठान, काठमाडौंमा सम्पन्न ‘मिसेज नेपाल वर्ल्ड २०२४’ प्रतियोगितामा डेनिला कार्कीले विजयी हुँदै उपाधि जितेकी छन् । प्रतियोगी नम्बर २१ की कार्कीले यो उपाधि जितेर आगामी मिसेज वर्ल्डमा नेपालको प्रतिनिधित्व गर्ने अवसर प्राप्त गरेकी हुन् । प्रतियोगिता रिबन इन्टरटेनमेन्टले आयोजना गरेको थियो ।

प्रतियोगितामा सुयाशा राउत (प्रतियोगी नम्बर १०) मिसेज नेपाल इन्टरनेशनलको उपाधि विजेता घोषित भइन्, जसले सिंगापुरमा हुने मिसेज इन्टरनेशनल प्रतियोगितामा नेपालको प्रतिनिधित्व गर्नेछिन् । त्यसै गरी, प्रतियोगी नम्बर २६ की रेश्मा घिमिरे मिस नेपाल इन्टरनेशनलको उपाधि जित्दै, मिस इन्टरनेशनलको मञ्चमा नेपाललाई प्रतिनिधित्व गर्नेछिन् ।

यस प्रतियोगितामा अन्य उत्कृष्ट प्रतियोगीहरूलाई पनि रनर-अपको सम्मान दिइएको थियो । प्रतियोगी नम्बर १३, अलिना घिमिरे फर्स्ट रनर-अप, किरण कार्की (प्रतियोगी नम्बर १९) सेकेन्ड रनर-अप, र अनु कार्की (प्रतियोगी नम्बर ४) थर्ड रनर-अप घोषित भए ।

प्रतियोगिता नेपाली विवाहित महिलाहरूको सुन्दरता, आत्मविश्वास, र प्रतिभालाई सम्मान गर्दै आयोजना गरिएको हो । रिबन इन्टरटेनमेन्टका प्रमुख निशुकान्त झाले नेपाली महिलाहरूलाई राष्ट्रिय तथा अन्तर्राष्ट्रिय स्तरमा उचाइ दिन यो प्रतियोगिता आयोजना गरेको बताए ।

अश्विनीकान्त झाको कोरियोग्राफीमा सम्पन्न यो प्रतियोगिताको प्रमुख निर्णायक सिएनएन हिरो अनुराधा कोइराला थिइन् भने अन्य निर्णायकहरूमा कलाकार केदार घिमिरे, पत्रकार अखण्ड भण्डारी लगायत थिए ।