चलचित्र छिरिङ्गको ट्रेलर रिलिज, बहुपति प्रथा नै चलचित्रको कथा

गायक टर्न नायक यश कुमारको डेव्यु निर्देशन रहेको चलचित्र छिरिङ्गको अफिसियल ट्रेलर रिलिज गरिएको छ । आइतवार राजधानीमा आयोजित पत्रकार सम्मेलनका बिच चलचित्रको ट्रेलर सार्वजनिक गरिएको हो ।

गायक टर्न नायक निमा रुम्वा र यश कुमारका साथै यसै चलचित्रबाट डेव्यु गरेकी कामना भुजेलको मुख्य भुमिका रहेको ट्रेलर एक्सन प्रदान रहेको छ । ३ मिनेट ७ सेकेण्ड लामो ट्रेलर प्रेम र द्वन्द्वले भरिएको छ । ट्रेलरका आधारमा भन्ने हो भने चलचित्रको मेकिङ उच्च देखिन्छ । उपल्लो मुस्ताङमा चलचित्र खिचिएको छ ।

बहुपति प्रथामा आधारित चलचित्रमा एक युवतीका दुई श्रीमान विचको द्वन्द्व हावी छ । सुनिल माथेमा प्रधान, आइबी दर्नाल र नवीन बुढाथोकीको निर्माण रहेको चलचित्रलाई यश र याम थापाले संयुक्त रुपमा लेखेका हुन् । चलचित्रमा मानकृष्ण महर्जनको छायाँकन, चन्द्र पन्तको द्वन्द्व, कविराज गहतराजको कोरियोग्राफी, मिलन श्रेष्ठ र साहिल खानको सम्पादन छ ।

चलचित्र आगामी असोज १२ गते देशव्यापी रिलिज हुँदैछ । सोही मितिमा अन्य दुई चलचित्रहरु पनि रिलिज हुँदैछन् । निर्देशक यशकुमारका अनुसार आफुहरुले असोज १२ गतेको मिति तय गर्दा गर्दा उक्त दिन अरु चलचित्र प्रदर्शन हुने कुरै थिएन तर साढेको जुधाई बाच्छाको मिचाईमा आफु परेको उनले आरोप लगाए । वितरकहरुले अन्य चलचित्रका निर्मातालाई उचालेर सोही मितिमा प्रदर्शन गर्न लगाएको उनको भनाई छ ।

चलचित्र छिरिङ्गको विस्तृत विवरण हेर्न यहाँ क्लिक गर्नुस्