गोरखाबाट चलचित्र ‘पहाड’को छायाङ्कन सुरु, आठ वर्षपछि निर्देशनमा फर्किए घिमिरे

वरिष्ठ निर्देशक तुलसी घिमिरेको निर्देशनमा बन्ने नेपाली चलचित्र ‘पहाड’को छायाङ्कन गोरखाबाट सुरु भएको छ । गोरखा दरबारमा पूजाआजा गरी वरिष्ठ कलाकार मदनकृष्ण श्रेष्ठ, अभिनेता अरुण क्षेत्री र डेब्यु अभिनेत्री पञ्चमी घिमिरेले मुहूर्त सर्ट दिए ।

चलचित्रको कथावस्तु युवा जनशक्ति विदेश पलायन हुँदा खाली भएका पहाड र यसले ल्याउने सामाजिक र आर्थिक समस्यामा केन्द्रित रहेको बताइएको छ । निर्देशक घिमिरेले अहिलेको समाजको तीतो यथार्थलाई फिल्ममार्फत दर्शकमाझ पुर्‍याउने प्रयास गर्ने बताए ।

घिमिरेले भने, ‘मानव बसोबासविहीन बनेको उच्च पहाडको कथा समेटिएको छ, चलचित्रले हाम्रो दायित्व र देशको आवश्यकतालाई चित्रण गर्छ । विषयअनुसार हामीले कलाकार चयन गरेका छौँ । नयाँदेखि पुराना पुस्तासम्मलाई समेटेर काम गर्न पाउँदा उत्साहित छु ।’ उनले राम्रो टिम पाएको र सेटमा फर्किँदा छुट्टै उत्साह महसुस गरेको बताए ।

घिमिरेले पछिल्लो चलचित्र २०७३ सालमा ‘दर्पण छाया २’ पछि निर्देशनबाट केही समय विश्राम लिएका थिए । तुलसी घिमिरेलाई नेपाली चलचित्रको ‘गौरवपूर्ण नाम’ मानिन्छ । घिमिरेको चलचित्र ‘दर्पण छाया’ नेपाली चलचित्र उद्योगमा उच्च आर्जन गर्ने पहिलो चलचित्र मानिन्छ । सन् १९८१ मा ‘बाँसुरी’ चलचित्रबाट निर्देशन सुरु गरेका घिमिरेले कुसुमे रुमाल, अन्याय, लाहुरे, चिनो, कोसेली, दक्षिणा, बलिदान, दर्पण छाया जस्ता सफल चलचित्रहरू निर्देशन गरेका छन् ।

ओजस्वी केसी निर्माता रहेको फिल्मलाई प्रमोद प्रधानले छायाङ्कन गरिरहेका छन् । भारतमा चलचित्र, वेब सिरिज र टेलीफिल्मको छायाङ्कन गरिसकेका छायाकार प्रधान निर्देशक घिमिरेसँग अन्याय, कोसेली, चिनो र दक्षिणामा सहकार्य गरेका छन् ।

उनी तीस वर्षपछि नेपाली चलचित्र छायाङ्कनका लागि नेपालमा आएका हुन् । छायाङ्कन गोरखा आसपासमा २५ दिन र भारतमा १५ दिन हुनेछ । भाग्यरत्न फिल्म्स प्रालिको ब्यानरमा निर्माण भइरहेको चलचित्रमा विपिन कार्की, सुनिल थापालगायतका कलाकारको पनि प्रमुख अभिनय रहनेछ । यसमा रञ्जित गजमेर सङ्गीत निर्देशक, भारती घिमिरे क्रिएटिभ निर्देशक रहेका छन् ।

रिम्पोछे लामा थिङ्ग र सुरेश लामा थिङ्ग सह निर्माता रहेको चलचित्र नेपालमा वैङ्कटेश इन्टरटेनमेन्ट र डायस्पोरामा सेभेन सिज इन्टरनेशनल फिल्म्सले वितरण गर्नेछ । यसको पब्लिसिटी डिजाइन रोयल भीमसेन र ट्राइडेन्ट कन्सेप्टले गरेका हुन् ।