आफ्नै मुद्दासँग जोडेर पलले ल्याए ‘तिमीलाई हेर्ने बानी पर्‍यो’

नाबालिक बलात्कार अभियोगमा सफाइ पाएपछि पल शाहले अभिनय गरेको म्युजिक भिडियो ‘तिमीलाई हेर्ने बानी पर्‍यो’ सार्वजनिक गरिएको छ । 

पल शाहकै कथा तथा निर्देशन रहेको भिडियोमा उनले आत्मसमर्पण गरे देखि छुटे सम्मको कथालाई प्रस्तुत गरेर उनकैै मुद्दासँग जोडिएको छ । आत्मसर्पण गरेर पललाई प्रहरीले अदालत लैजाँदाको दृष्य जस्ताको तस्तै उतार्न खोजिएको छ । उक्त दृष्यमा पल त्यही पहिरनमा छन्, जुन पहिरनमा उनी त्यसबेला अदालत लैजाँदा थिए ।

पलको रिहाइका लागि मन्दिर, मस्जिददेखि गुम्बासम्म प्रार्थना गरिएको दृष्य पनि समावेश गरिएको छ । उक्त दृष्यले भने बालकालिका तथा धर्मगुरुहरु बलात्कार जस्तो जगन्य अपराधको आरोपितको पक्षमा प्रार्थना गर्छन भन्ने गलत सन्देश दिएको छ । पलले आफ्नो पक्षमा सहानुभूति बटुल्न यस्ता केही दृष्यहरु भिडियोमा प्रयोग गरेको सहजै बुझ्न सकिन्छ । पल जेलबाट निस्किएपछि आफन्त र शुभचिन्तकले फुलमाला लगाएर स्वागत गरेको, आमाले आरती उतारेको दृष्यहरु पनि भिडियोमा छन् । जुन वास्तविक जीवनसँग मेल खान्छन् ।

प्रेमिल भावको गीतमा पलको प्रेमिकाको भूमिकामा सनिशा भट्टराईले अभिनय गरेकी छन् । उनलाई कुरी बसेकी प्रेमिका सँगको मिलनसँगै भिडियो सकिएको छ । वास्तविक जीवनका धेरै घटना भिडियोमा मेल खाएका कारण पलकी कुन प्रमिकाको भूमिकामा सनिशाले अभिनय गरेकी हुन त्यो भने यसै भन्न सकिने अवस्था भएन ।

पलको बुवाको भूमिकामा प्रकाश अधिकारी, आमाको भूमिकामा सुर्यमाला खनाल र बहिनीको भूमिकामा प्रिन्सु तिवारीले अभिनय गरेका छन् । 

अनु चौधरीको स्वर रहेको गीतमा पुष्पन प्रधानको शब्द तथा संगीत रहेको छ । गीतको पुरुष भर्सनलाई पुष्पन प्रधानले नै गाएका थिए ।