‘परदेशी २’को अग्रीम टिकट बुकिङ खुल्ला

शुक्रबारबाट प्रदर्शन हुने चलचित्र ‘परदेशी २’को अग्रीम टिकट बुकिङ खुल्ला गरिएको छ । नेपालको सबैभन्दा ठूलो मल्टीप्लेक्स चेन क्यूएफएक्सले देशभरका स्टेशनमा पहिलो दिन ३७ शोज उपलब्ध गराएको छ । भने दोस्रो ठूलो मल्टीप्लेक्स चेन आइएनआईले १२ शोज दिएको छ । रञ्जना सिनेप्लेक्स, कीर्तिपुर सिनेप्लेक्स र सिके सिनेमाजले समान ४÷४ शो दिँदा क्यूज सिनेमाजले २ शो, बिग मुभिजमा ३ शो र वान सिनेमाज्माले १२ शो उपलब्ध गराएको छ ।

आर्थिक अभावका कारण वैदेशिक रोजगारीमा जान बाध्य नेपालीहरुको कथालाई प्रस्तुत गरेका चलचित्रले प्राप्त शोजहरु हेर्दा ओपनिङ्ग व्यापार बम्पर हुन सक्ने सम्भावना छ । यसको पहिलो सिरिज ‘परदेशी’ सुपरहिट चलचित्र भएकोले पनि ‘परदेशी २’को ओपनिङ्ग ब्यापारमा सकारात्मक प्रभाव पर्ने नै छ ।

राम्रो प्रचार र बलियो स्टारकास्टका कारण चलचित्र प्रतिक्षित बनेको छ । यसको लक्षित दर्शक र दशैको अवसर पारी प्रदर्शन हुने भएकोले पनि ब्यावसायिक सफलता पाउने अपेक्षा गर्न सकिन्छ । नारायण रायमाझीद्वारा निर्देशित चलचित्रमा प्रकाश सपूत, केकी अधिकारी, प्रशान्त तामाङ, वर्षा सिवाकोटी, दीलिप रायमाझी, नीर शाह, रमा थपलिया, सबिन बास्तोला, देबेन्द्र बब्लुलगायतको अभिनय छ । गायनमा स्थापित सपूतले यही चलचित्र अभिनेताको रुपमा डेब्यू गरेका हुन् ।

नारायण इन्टरनेसनलको प्रस्तुतिमा निर्माण भएको चलचित्रमा राजेश वंशल र निर्देशक रायमाझीको लगानी छ भने रमेश बिजीको कथा र पटकथा लेखन रहेको छ ।