‘परदेशी–२’को गीत ‘परदेशी छुकछुके रेलैमा’ सार्वजनिक

नारायण रायमाझी निर्देशित चलचित्र ‘परदेशी–२’मा समावेश ‘परदेशी छुकछुके रेलैमा’बोलको झ्याउरे गीत सार्वजनिक गरिएको छ । सार्वजनिक गीतमा निर्देशक रायमाझी सँगै तेजेन्द्र गुरुङ, टिका पुन, देवी घर्ती र ममता गुरुङको स्वर छ । निर्देशक रायमाझीकै रचना रहेको गीतमा उनीसँगै प्रेमदेव गिरीले संगीत दिएका छन् ।

कलाकारहरु प्रकाश सपूत, केकी अधिकारी, प्रशान्त तामाङलगायतलाई प्रस्तुत गरिएको गीतमा शेखर घर्ती मगर, पूर्ण लामा र विवेक खड्का, रविता मगर, पवित्रा गुरुङ, विन्दु खड्का, लाक्पा लामा, सरस्वती धिमाल, प्रजी अहिना सुनार लगायतको नृत्य रहेको छ । गीतको भिडियोमा रामजी लामिछाने र गोविन्द राईको निर्देशन रहेको छ भने कुलमान नेपाली र शेखर घर्ती मगरले नृत्य निर्देशन गरेका हुन् ।

नेपाली चलचित्रमा कमै मात्र समावेश गरिने यसप्रकारको मौलिक झ्याउे गीतले स्रोता–दर्शकलाई फरक स्वाद दिने निर्माण पक्षको विश्वास छ । ‘परदेशी–२’ दशैंको छेको पारेर यही असोजको २६ गतेबाट प्रदर्शनमा आउने तयारीमा छ । राजेश वंशल र नारायण रायमाझीको निर्माण रहेको चलचित्रमा प्रकाश, केकी र प्रशान्तका साथमा वर्षा शिवाकोटी, दीलिप रायमाझी, नीर शाह, रमा थपलिया, सबिन बास्तोला, देबेन्द्र बब्लुलगायतको अभिनय छ । चलचित्रको कथा एवं पटकथा रमेश बिजीले लेखेका हुन् । मानकृष्ण महर्जनको छायांकन रहेको चलचित्रलाई दीर्घ खड्काले सम्पादन गरेका हुन् ।

युवापुस्तामा रहेको विदेश मोहको कथामा आधारित चलचित्र सेन्सर पास भइसकेको छ ।