चलचित्र ‘राजागंज: पूजा, सर’को टिजर सार्वजनिक

दीपक रौनियार निर्देशित चलचित्र ‘राजागंज: पूजा, सर’को टिजर सार्वजनिक भएको छ । टिजरमा सांसदको छोरा सहितका दुई बालक अपहरणमा परेपछि उनीहरुलाई मुक्त गराउन प्रहरीले चलाएको खोजी अप्रेसनको कथा प्रस्तुत गरेको छ । सोसल ड्रामा तथा एक्सन चलचित्रमा आशा मगराती मुख्य भूमिका छिन् ।

चलचित्रको टिजरमा आशाका अलवा पूर्वमिस नेपाल निकिता चाण्डक, दयाहाङ राई, ऋचा शर्मा लगायत कलाकार फिचर्ड छन् । चलचित्रमा विजय बराल, गौमाया गुरुङ, आरती मण्डल, घनश्याम मिश्र, परमेश्वर कुमार झा, पशुपति राई र नीरज श्रेष्ठको पनि अभिनय रहेको छ ।

निर्देशक रौनियारको ‘हाइवे’ र ‘ह्वाइट सन्’ पछि यो तेस्रो निर्देशकिय फिचर चलचित्र हो । भेनिसमा विश्व प्रिमियर तयारीमा रहेको चलचित्रको प्रिमियरअघि नै विभिन्न देशमा चलचित्रको वितरण अधिकार पनि बिक्री भइसकेको निर्माण टिमले जानकारी दिएको छ । विभिन्न अर्न्तराष्ट्रिय महोत्सव र हल रिलिज अघि नै विभिन्न देशको राइट बिक्री भएपछि निर्देशक रौनियारले खुसी व्यक्त गरेका छन् ।

‘राजागंज स् पूजा, सर’ २९ अगस्ट अर्थात् आगामी बिहीबार भेनिसमा विश्व प्रिमियर हुँदैछ । भेनिस प्रिमियरका लागि निर्देशक रौनियार, अभिनेत्री मगराती सहितका केही दिनमा कलाकार इटाली जाँदैछन् ।

चलचित्रले नर्वेजियन चलचित्र इन्स्टिच्युटको सोर्फोन्डबाट पनि आर्थिक सहयोग प्राप्त गरेको छ । चलचित्रको निर्माणमा आदि फिल्मस्का तर्फबाट निर्देशक रौनियार र अभिनेत्री मगराती, बासुरी फिल्मस्का तर्फबाट रामबाबु गुरुङ र मनिराम पोखरेल तथा तन्हाउसर गेटका तर्फबाट एलन आर मिलिगनले सहकार्य गरेका छन् ।