१ सय १३ प्राबिधिकलाई राजेश हमालको आर्थिक सहयोग, प्रति व्यक्ति ५ हजार

लेन्सनेपाल २०७७ असोज ४

महानायक राजेश हमालले १ सय १३ जना चलचित्र प्राबिधिकहरुलाई आर्थिक सहयोग गरेका छन् । हमालले प्रतिव्यक्ती ५ हजारका दरले कुल ५ लाख ६५ हजार सहयोग गरेका हुन् ।

कोरोना भाइरसको संक्रमण न्यूनिकरणका लागि सरकारले चैत्रमा लकडाउन गरेपछि चलचित्र क्षेत्र ठप्प छ । हाल सम्म पनि चलचित्रको छायाँकन नहुँदा सयौं प्राबिधिकहरु मारमा परेका छन् । चलचित्रमा दैनिक काम गरेर गुजारा चलाउने प्राविधिकहरुलाई परेको संकटप्रति ध्यान दिदै हमालले सहयोग रकम उपलब्ध गराएका हुन् ।

चलचित्र प्राबिधिक संघले छनौट गरेका दैनिक गुजारा चलाउन धौं धौं भएका प्राबिधिकहरुलाई उत्त रकम सहयोग गरिएको हो ।

राजधानीको डिल्लीबजारस्थित विजय स्मारक विद्यालयमा आयोजित कार्यक्रममा बोल्दै नायक राजेश हमालले प्राविधिकहरु आफ्ना लागि सधै नै उच्च स्थानमा रहेको बताए । उनले, यो रकम ठूलो नभएपनि समस्यामा परेको समयमा केही सहयोग हुने अपेक्षा गरे ।

नायक हमालले देश बाहिर रहेका आफ्ना केही साथीहरुको समेत यसमा सहयोग रहेको भन्दै धन्यवाद व्यक्त गरेका थिए ।