चलचित्र ‘रावायण’को टिजर सार्वजनिक

भदौ २१ गतेबाट रिलिज हुने चलचित्र ‘रावायण’को टिजर सार्वजनिक गरिएको छ । शुक्रबार राजधानीमा आयोजित पत्रकार सम्मेलन मार्फत टिजर सार्वजनिक गरिएको हो ।

टिजरमा अधिकांश द्वन्द्वका दृष्यलाई स्थान दिइएको छ । नायक पल शाहको एक्सनलाई प्राथमिकतामा राखिएको प्रमोद अग्रहरि, प्रकाश शाह, प्रदीप ढकाललाई नि सशक्त रुपमा प्रस्तुत गरिएको छ । टिजरमा नायिका पुजा शर्मा, प्रियंका कार्की, निकिता चण्डक पनि फिचर्ड छन् ।

प्रेमकथाका चलचित्र निर्माणमा अब्बल मानिएका निर्देशक सुदर्शन थापा चलचित्र ‘रावायण’का निर्देशक हुन् । उनले आफ्नो ‘भिजन’ चलचित्रको टिजरमा देखिएको बताए । ‘अहिले टिजरमा मात्र देखिएको छ । दर्शकले पछि चलचित्रमा अझ बढी हेर्न पाउनुहुनेछ’, उनले भने, ‘यो चलचित्र मेरा लागि चुनौतिपूर्ण थियो । मैले यो चलचित्रमार्फत आफूलाई परिवर्तन गर्ने कोशिस गरेको छु ।’

नायक पल शाहले आफ्नो रोमान्टिक छविलाई पर्दामा हेरिरहनु भएका दर्शकका लागि ‘रावायण’को चरित्र नयाँ स्वाद हुने बताए । उनले चलचित्रमा आफ्नो दोहोरो भूमिका रहेको खुलाए । ‘मेरो लागि यो चरित्र नयाँ हो । चलचित्रमा मैले कान्छा र रागव नामका दुई चरित्र निर्वाह गरेको छु । एउटा चरित्र पोजेटिभ र अर्को नेगेटिभ हुन्छ’, उनले भने, ‘चलचित्रमा मेरा लागि नेगेटिभ पार्ट चुनौतिपूर्ण थियो । जुन ट्रेलरमा देखिएको छ ।’

चलचित्रकी नायिका तथा निर्मात्री पूजा शर्माले अब रोएर चलचित्र नचल्नेमा आफू ढुक्क रहेको बताइन् । ‘अब रोएर चलचित्र चल्दैन । टिमको राम्रो साथ पाइयो भने मात्र चलचित्र चल्ने रहेछ’, उनले भनिन् । कलाकार प्रमोद अग्रहरिले दर्शकले ‘रावायण’बाट आफ्नो चरित्र र कथावस्तुमा नयाँ स्वाद पाउने दाबी गरे । अर्का कलाकार प्रकाश शाहले आफ्ना लागि चलचित्रको पात्र चुनौतीपूर्ण रहेको बताए । चलचित्रका निर्देशक सुदर्शन थापा हुन् । सुदर्शन थापा प्रोडक्शन र पुजा शर्मा प्रोडक्शनको संयुक्त व्यानरमा बनेको चलचित्रकी निर्माता पुजा शर्मा हुन् । चलचित्रमा सुशन पाठक कार्यकारी निर्माता छन् । चलचित्रमा पल शाह, पुजा शर्मा, प्रियंका कार्की, प्रमोद अग्रहरी, निकीता चण्डक, प्रकाश शाह, कैलाश रावल, अर्जुनजंग शाही, शर्मिला मल्ल, प्रदिप ढकाल, रोजिता पराजुलीलगायतको अभिनय छ ।

चलचित्रमा शिवम अधिकारीको लेखन, प्रदीप श्रीवास्तवको पटकथा, सौरभ लामाको छायांकन, मिलन श्रेष्ठको सम्पादन, निरज सिंह, रेवन आरती सिंहको संगीत, नकासा अजिज, कुनाल गुञ्जवाला, सोनु कक्करको स्वर, डा. कृष्णहरि बराल र प्रदीप श्रीवास्तवको शब्द,विक्रम स्वार र रामजी लामिछानेको कोरियोग्राफी, श्री श्रेष्ठको एक्सन, समीर मियाँको भीएफएक्स, राजेन्द्र मोक्तानको कलर र विजय बस्यालको पोस्टर डिजाइन छ ।