चलचित्र ‘रावायण’को ट्रेलर सार्वजनिक

लेन्सनेपाल २०८१ भाद्र ६

भदौ २१ गते रिलिज हुने चलचित्र ‘रावायण’को ट्रेलर सार्वजनिक गरिएको छ । बिहीबार राजधानीमा एक कार्यक्रम गर्दै ट्रेलर रिलिज गरिएको हो । ट्रेलरमा प्रेम र द्वन्द्वको कथालाई चित्रण गरिएको छ । पल शाह र पुजा शर्मालाई केन्द्रमा राखिएको ट्रेलरमा प्रियंका कार्की, प्रमोद अग्रहरीलगायतका कलाकारलाई पनि स्थान दिइएको छ ।

कार्यक्रममा बोल्दै चलचित्रका कथाकार, निर्माता र निर्देशक सुदर्शन थापाले नाम झट्ट सुन्दा धार्मिक लागे पनि चलचित्र त्यस्तो नभएको खुलाए । ‘यो धार्मिक रावायणसँग सम्बन्धित छैन । रामायाणमा रामलाई प्राथमिकता दिइएको थियो । हाम्रो रावायणमा रावणलाई प्राथमिकता दिएका छौं ।’ उनले भने – ‘रावणलाई प्राथमिकता दिँदा चलचित्र फरक स्वादको बन्छ भन्ने लागेर हामीले त्यस्तै कथामा बनाएका छौं ।’

सुदर्शन थापा प्रोडक्शन र पुजा शर्मा प्रोडक्शनको संयुक्त व्यानरमा बनेको चलचित्रको निर्माता पुजा शर्मा र कार्यकारी निर्माता सुशन पाठक हुन् । चलचित्रमा निकीता चण्डक, प्रकाश शाह, कैलाश रावल, अर्जुनजंग शाही, शर्मिला मल्ल, प्रदिप ढकाल, कैलाश रावल, विशाल पहारी, सुशान्तकुमार श्रेष्ठलगायतको पनि अभिनय रहेको छ ।

चलचित्रमा शिवम अधिकारीको लेखन, सौरभ लामाको छायांकन र मिलन श्रेष्ठको सम्पादन रहेको छ ।