‘हामी छौं’ मार्फत अभिनयमा सलिना

लेन्सनेपाल २०८० फागुन २५

सात प्रदेशका सात ब्यक्तिको सहयोगार्थ डकुड्रामा ‘हामी छौं’ निर्माण हुने भएको छ । निर्देशक शोभित बस्नेतकी छोरी सलिना बस्नेतले आर्यन पौडेलसँग मिलेर यो डकुड्रामा निर्माण गर्न लागेकी हुन् ।

आर्थिक रुपमा कमजोर, अशक्त मानिसलाई सहयोग गर्ने उद्देश्य राखिएको डकुड्रामा सात भाग लामो रहने छ । जसका लागि सात प्रदेशका सात जना अशक्त, आर्थिक रूपमा कमजोर व्यक्तिलाई छनोट गरिनेछ ।

सलोन सलिना फिल्मस्को ब्यानरमा निर्माण हुने डकुड्रामाका फरक फरक एपिसोडलाई भिन्ना भिन्नै सात निर्देशकले निर्देशन गर्नेछन् । यद्यपी निर्देशकको टुङ्गो भने लागिसकेको छैन । ५० लाख अनुमानित बजेट छुट्याइएको डकुड्रामामा संगीत शम्भुजित बास्कोटाको संगीत र आनन्द अधिकारीको गीत रहनेछ ।

सलिना र आर्यन ड्रामाको छायांकनको लागि आगामी मेमा नेपाल आउँदैछन् । सलिना अस्ट्रेलियाको सिड्नी र आर्यन ब्रीज्बेनमा कार्यरत छन् ।