सौगात भन्छन् ‘मन्त्र’ आइरहेका चलचित्र भन्दा फरक छ

आफ्नो चरित्रमा मेहनत गर्ने कलाकार हुन्, सौगात मल्ल । अभिनयका माध्यमबाट आफुले निभाएको पात्रलाई न्याय दिन सक्नु नै उनको खुबी हो । उनै सौगात अभिनित चलचित्र ‘मन्त्र’ यही बैशाख १६ गतेबाट प्रदर्शन हुँदैछ ।

‘मन्त्र’ एउटा अर्गानिक चलचित्र बनेको कुरामा सौगात ढुक्क देखिए । पोष्ट प्रोडक्सनको क्रममा आफुले २ पटक चलचित्र हेरिसकेको उनले जनाएका छन् । उनी आफुले चलचित्र उत्कृष्ट बनेको पाएकोले नै दर्शकलाई पनि सोही कन्फिडेण्टका साथ चलत्रि हेर्न आग्रह गरेको बताउँछन् ।

हिमाली भेगको कथा चलचित्रले भनेको छ । चलचित्रलाई हिमाली प्रेमकथा पनि भनिएको छ । सौगात गोठालोको भूमिकामा छन् । त्यसो त सौगातका लागि मन पर्ने मौसम पनि चिसो हो । यसअर्थ मनास्लु हिमाल आसपास छायाँकन गर्दा उनलाई मौसमका कारण खासै कठिनाई भएन । यसअघि सौगातले चलचित्र कागबेनीमा पनि हिमाली भेगमै छायाँकन सकाएका थिए । उनी सोही अनुरुपको पात्रमा देखिएका छन् । यसअर्थ ‘मन्त्र’का लागि आफ्नो भूमिका विकसित गर्न उनलाई थप सहयोग भयो ।

‘मन्त्र’लाई आफुले अहिले गरिरहेका भन्दा भिन्न कथाको चलचित्र भनेका छन् सौगातले । यसमा हिमाली स्वाद पनि पाइने उनको जिकिर छ । उनी चलचित्रले कसैलाई पनि निराश नबनाउने बताउँछन् । सौगातले छायाँकनको केही दिन अघि नै मनास्लु आसपास पुगेर त्यहाँको रहनसहन पनि अब्जर्व गरेका थिए । स्थानियहरुसँग् संगत गरेर सिकेका कुराले आफुलाई सोही अनुरुप प्रस्तुत गर्न सहज भएको उनको बुझाई छ ।

खिलबहादुर गुरुङ निर्देशित चलचित्रमा सौगातका अलवा दिया पुन, बुद्धि तामाङलगायतका कलाकारको अभिनय रहेको छ । सुरेश कार्की, रविराज कार्की र सुभ श्रेष्ठ निर्माता रहेको चलचित्रको कार्यकारी निर्माता देवेन्द्र मानन्धर हुन् । मनास्लु हिमालको बेसक्याम्प क्षेत्रमा छायाँकन गरिएको चलचित्रमा परिक्षेद सेनको कथा, साम्तेन भुटिया, सुनिल निउरे र सेन स्वयंको पटकथा, सन्तोष सुनारको संगीत, सञ्जय लामाको छायांकन र मित्र डि।गुरुङको सम्पादन छ ।