अधिकांश चलचित्र नाम मात्रका सिक्वेल, ब्राण्ड भ्यालु क्यास गर्ने बाहेक अरु छैन खास

सन् २००५ को चलचित्र पापी मान्छेमा खलनायकको भुमिका निभाएका सुनिल थापा जेल चलान भएसँगै चलचित्र सकिन्छ । ३ वर्ष पछि सन् २००८ को चलचित्र पापी मान्छे २ को शुरुमै ३ वर्ष पछि सुनिल थापा जेलबाट रिहा भएको देखाइन्छ । यसरी चलचित्रको पछि २ थपेर निर्माण गर्दै गर्दा कथामा निरन्तरता दिने प्रयास गरियो । दिपक श्रेष्ठ निर्देशित यही चलचित्र नेपालको पहिलो सिक्वेल चलचित्र हो ।

पापी मान्छेको कथामा निरन्तरता दिदै सिक्वेलकै रुपमा पापी मान्छे २ बने पनि त्यसपछि बनेका अधिकांश चलचित्रहरु सिक्वेल भन्दा बढी सिरिजका रुपमा आए ।

न त कथामा तालमेल न त पात्रमा । हिट चलचित्रको ब्राण्ड भ्यालु क्यास गर्ने बाहेक अरु केही हुन सकेन । हुन त पछिल्लो समय सिक्वेल वा सिरिज फेसनको रुपमा अघि आएको छ भन्दा फरक नपर्ला । हिट चलचित्रको मात्र होइन फ्लप चलचित्रको समेत सिक्वेल बन्नु वा घोषणा हुनुले यो एउटा लहड हो भन्नु अन्यथा हुँदैन । रहर र लहडले राम्रो चलचित्र बन्न सक्दैन भन्ने बुझ्न असहज पक्कै छैन ।

चलचित्रकर्मीको भनाई सुन्ने हो भने धेरै चलचित्र सिक्वेल हुन । तर, वास्तवमै कम चलचित्र मात्र सिक्वेलका रुपमा बनेका छन् । कथाकै निरन्तरताको कुरा गर्दा बाटो मुनिको फूल २ – बाटो मुनिको फूलबाट, लुट २ – लुटबाट, कबड्डी कबड्डी कबड्डी र कबड्डी कबड्डी – कबड्डीबाट, जात्रै जात्रा – जात्राबाट कथामा निरन्तर अघि बढेका चलचित्र हुन । यि चलचित्रलाई वास्तवमै सिक्वेल मान्न सकिन्छ । यसरी सिक्वेलका रुपमा बनेका चलचित्रको कुरा गर्दा पहिलो पार्टलाई जति तारिफ मिल्थ्यो दोस्रो वा तेस्रोमा सोही अनुरुप मिल्न सकेन । समिक्षकहरुले जात्राको सिक्वेल जात्रै जात्रालाई बाहेक अरु सिक्वेललाई खासै उत्कृष्ट मान्न सकेका छैनन् । ट्रेण्डसेटर चलचित्र लुटको सिक्वेल पनि नराम्रो सँग चिप्लियो ।

धेरै चलचित्रहरु सिक्वेलका नाममा सिरिज मात्र बनेका छन् । यसरी सिरिज बन्ने चलचित्रको शुरुवात कुसुमे रुमाल २ बाट भयो । सन् १९८५ को चलचित्र हो कुसुमे रुमाल । पहिलो पटक सफल व्यापारको सिल्भर जुब्ली मनाएको यो चलचित्रको सिरिज अर्थात कुसुमे रुमाल २ सन् २००९ मा प्रदर्शन भयो । सिरिज यसअर्थमा कि निरक पौडेल निर्देशित कुसुमे रुमाल २ को कथा कुसुमे रुमालको भन्दा नितान्त भिन्न थियो । मिल्थ्यो त केवल चलचित्रको नाम मात्र ।

अहिले सिरिज बन्ने क्रम निकै झागिंएको छ । हिट फिल्मको नामलाई क्यास गर्न सकिने हुँदा व्यवसायिक रुपमा अब्बल सावित हुने आशा धेरै चलचित्रकर्मीहरुको रहेको पाइन्छ । केही चलचित्रका सिरिज हिट पनि भएका छन् । देखासिकिमा नामको पछि २ वा रिटन्र्स थपे पनि केही चलचित्र चुर्लुम्मै डुबेका पनि छन् ।

सिरिज बनाएर धेरै कमाउने चवलचित्रमा नाइ न भन्नु ल का लगभग सबै सिरिज पर्छन । नाइ न भन्नु ल ५ सम्म बनिसकेको छ । यो भन्दा पनि अझ धेरै कमाउने चलचित्र छक्का पञ्जा सिरिज हो । छक्का पञ्जाको ३ सिरिज प्रदर्शन भइसकेका छन् । व्यवसायिक रुपमा पनि छक्का पञ्जा सिरिजका ३ वटै चलचित्रले उत्कृष्ट नतिजा हात पारेका छन् । त्यो बाहेक ए मेरो हजुरको पनि ३ सिरिज प्रदर्शन भइसकेको छ । चौथो भाग अहिले छायाँकनको क्रममा छ । यो चलचित्रका सिरिज पनि व्यवसायिक रुपमा अब्बल नै ठहरीए ।

समिक्षागत रुपमा ठिक ठाक भएपनि केही सिरिजले राम्रो व्यापार गरेको कुरा नकार्न सकिदैन । यद्यपी छक्का पञ्जाको हकमा भने समिक्षकहरुले पहिलो भन्दा दोस्रो र दोस्रो भन्दा तेस्रो सिरिजललाई अब्बल माने । प्रदर्शन हुन बाँकी भएपनि टिजर र गीतसंगीतका कारण प्रेमगीत ३ को चर्चा निकै छ । यो चलचित्र अब्बल बनेको आशा गर्ने ठाँउहरु देखिएका छन् । यसको पहिलो सिरिज प्रेमगीत र दोस्रो प्रेमगीत २ ले पनि राम्रै प्रतिक्रिया पाएका थिए । व्यवसायिक रुपमा भने दुवै सिरिज सन्तोषजनक मात्र थिए, जुन रुपमा अपेक्षा थियो त्यो हुन सकेन । प्रदर्शनको तयारी सकेर कोभिड १९ का कारण अन्तिम समयमा स्थगित हुन पुगेको चलचित्र म यस्तो गीत गाउँछु २ पनि चर्चा मै छ । यसको पहिलो सिरिज व्यवसायिक व्यवसायिक रुपमा सन्तोषजनक नै थियो ।

चर्चामा रहेको सिरिज चलचित्रहरुमा बिर बिक्रम २, होस्टेल रिटन्र्स, सायद २, पिंजडा व्याक अगेन कुनैले पनि सोचे जस्तो सफलता पाउन सकेनन् । यि सबै चलचित्रको सिरिज भन्दा पहिलो चलचित्र नै दर्शकहरुले मन पाराए ।

चपली हाइट सफल भएपछि यसको पनि सिरिज निर्माण भयो । तर, चपली हाइट २ असफल भयो भने ३ प्रदर्शनको लागि तयार छ । रेखा थापाको दोहोरो भुमिका रहेको चलचित्र हिम्मतको सफलता पछि निर्देशक दिपक श्रेष्ठले आफ्नो व्यानरमा हिम्मत २ बनाए । तर, यो चलचित्र असफल भयो । न त हिम्मतको कथा न त कलाकार नै दोहोरिएका थिए । यस्तै रेखाकै डेव्यु चलचित्र हिरोको पछि रिटन्र्स थपेर चलचित्र बनाइयो । रेखाले पनि अभिनय गरिन । बिडम्बना यो चलचित्र त हलमा प्रदर्शन हुनै सकेन । बल्ल तल्ल टिभी रिजिमा चित्त बुझायो । यता रेखाले ३ वर्ष अघि कसले चोर्यो मेरो मनको सिक्वेल बनाउने अनौपचारिक घोषणा गरिन । नाम कसले चोर्यो मेरो मन फेरी हुने भयो । तर, चलचित्र बनेन । अहिले छबी ओझाले कसले चोर्यो मेरो मन २ बनाउने बताएका छन् ।

कुनै समयको चर्चित चलचित्र हो दर्पण छाँया । यो चलचित्रले उक्त समय नेपाली चलचित्रको ट्रेण्ड नै चेन्ज गरेको थियो । ट्रेण्ड सेटर यो चलचित्रको सिरिज दर्पण छाँया २ पनि असफल भयो । अहिले दर्पण छायाँ पछि भनेर सिक्वेल बनाइने चर्चा चलिरहेको छ ।
चलचित्र बिन्दास खासै सफल नभएपनि यसका अन्य दुई सिरिज बने । विन्दास मात्र होइन चलचित्र धुमको पनि अन्य दुई सिरिज बनेका छन् । यस्तै जादुगर, इकु, आगो, शिकारी, क्यारिङ ग्याङ, मिसन पैसा, किस्मत जस्ता चलचित्रको पनि सिरिज बनेको छ । अर्थात नामको पछि २, व्याक अगेन वा रिटन्र्स थपेर अर्को चलचित्र बनाइएको छ । यद्यपी यि मध्ये धेरै चलचित्र आए गएको समेत दर्शकले पत्तो पाएनन् ।

सन् २०१५ को सुपरहिट चलचित्र परदेशीको पनि सिरिज निर्माण भइरहेको छ । कोभिड १९ का कारण बिचैमा रोकिएको चलचित्र परदेशी २ चलचित्र क्षेत्र खुलेपछि छायाँकनमा जाने तयारीमा छन् । यस्तै मेरो एउटा साथी छ २, अल्लारे २, पर्खिबसे २, गोपीकृष्ण २, कोहलपुर एक्सप्रेस २, बोबी २, बाग्मती २ र भैरे २ निर्माणको घोषणा गरिए पनि बन्ने सुरसार देखिदैन । मेरो एउटा साथी छ २ को निर्देशकका रुपमा अनुबन्धित भएका दिनेश राउतले चलचित्र छोडेका छन् । बरु राउतकै निर्देशन रहेको चलचित्र प्रसादको भने सिक्वेल बन्ने भएको छ, तर निर्देशक उनी हुनेछैनन । यो चलचित्रको प्रि–प्रोडक्सनको काम द्रुत गतिमा भइरहेको छ । यस्तै मिलन चाम्सले गोर्खा वारियर नामको चलचित्र सँगै यसको ४ सिरिज बनाउने जनाएका छन् । ठिलो चाँडो छक्का पञ्जा ४ र कब्डी कबड्डी ४ पनि आउने पक्का छ । यि बाहेक अन्य केही चलचित्रले सिरिज वा सिक्वेल निर्माणको घोषणा गरेका छन् । तर, यसरी निर्माण भएका चलचित्रले दर्शकमाथी न्याय गरेका छन् त ?