‘हनी बनी’मा सारा सिर्पाली, अनमोलको जोडी बन्ने पक्का

आगामी वर्षको दशैलाई प्रदर्शन मिति तय गरेको चलचित्र ‘हनी बनी’मा अभिनेत्रीमा सारा सिर्पाली अनुबन्धित भएकी छिन् । निर्माण टिम र अभिनेत्री साराबीच सोमबार लिखित सम्झौता भएको हो ।

दीवाकर भट्टराईको निर्देशन रहने चलचित्रका लागि यसअघि अनमोल केसी र सलोन बस्नेत फाइनल भएको भएपनि अभिनेत्री भने तय गरिएको थिएन । साराले चलचित्रमा अनमोलको जोडीका रुपमा काम गर्नेछिन । त्यसो त केही समय अघि चलचित्र बृत्तमा अनमोल र सारा प्रेम सम्बन्धमा रहेको गसिपले राम्रै स्थान पाएको थियो । राम्रो साथीका रुपमा रहेका अनमोल र साराले पहिलो पटक स्कृन सेयर गर्न लागेका हुन् । उनीहरुका जोडीलाई लिएर दर्शकमा थप उत्साह थप्ने पक्कै छ ।

मार्चबाट छायाँकनमा जाने चलचित्रलाई पुरुषोत्तम प्रधानले छायाँकन गर्नेछन् । अधिकांश छायाँकन लण्डनमा गरिने चलचित्रको हाल प्रि–प्रोडक्सनको काम भइरहेको छ । चलचित्रका अन्य कलाकार भने केही दिनमा तय गरिने निर्माता अजित कुमार थापाले बताएका छन् ।

एबी इन्टरनेशलको प्रस्तुती रहने चलचित्रमा गौतम प्रोडक्सन र भ्वाइस फिल्मस् लिमिडेटले सहकार्य गरेका छन् । अमित बस्नेत, अजित केआर थापा र परी राना निर्माता रहेको चलचित्रको कार्यकारी निर्मातामा अंकित गौतम र सनिस खकुरेल छन्, भने अजित सिंह सहनिर्माताको रुपमा रहनेछन् ।

यही टिमले यसअघि निर्माण गरेको चलचित्र ‘सम्हालिन्छ कहिले मन’ प्रदर्शनको तयारीमा छ ।