साङ्गीतिक छोटो फिल्म 'कोठा' सार्वजनिक

साङ्गीतिक छोटो फिल्म 'कोठा' सार्वजनिक गरिएको छ । शनिवार काठमाडौँमा रहेको एभरेष्ट फिल्म एकेडेमीमा एक कार्यक्रमको आयोजना गरी  छोटो फिल्म 'कोठा' सार्वजनिक गरिएको हो । आर्ट घरको निर्माणमा तयार भएको उक्त साङ्गीतिक छोटो फिल्मलाई भीष्म जोशीले तयार गरेका हुन् ।

जोशीको कथा तथा कन्सेप्टमा तयार साङ्गीतिक फिल्ममा काठमाडौँमा डेरा गरेर भविष्य खोजिरहेको युवा र युवाको मनोविज्ञानलाई प्रस्तुत गरिएको छ ।

सपना पोका बोकेर काठमाडौँ छिरेको ग्रामीण ठिटो र उसका भोगाई फिल्ममा देख्न सकिन्छ । निर्देशक जोशीले सहरमा भविष्य खोजिरहँदा गाउँमै छुटेका अतीतहरू अनि सहरमा भेटिएका र देखिएका रहरहरूको संयोजनलाई फिल्ममार्फत देखाएका छन् ।

पछिल्लो समयका चर्चित गायक सङ्गीतकार प्रशान्त सिवाकोटीको आवाज तथा उनैको सङ्गीतमा सार्वजनिक 'कोठा'मा आधुनिक र लोक दुवै लय सुन्न सकिन्छ । सङ्गीतकार सिवाकोटीले गीतमा देउडा भाकालाई पनि स्थान दिएका छन् । उनी आफैले गीत सार्वजनिक कार्यक्रममा भने, 'आफू झापाली भएर पनि सुदूरपश्चिमको देउडा भाका कोठा मार्फत गाउने प्रयास गरेको छु, विश्वास छ सबैले हाम्रो नयाँ साङ्गीतिक कोसेलीलाई माया गरिदिनुहुनेछ।'

साङ्गीतिक फिल्म सार्वजनिक कार्यक्रममा निर्देशक जोशीले  गीतलाई गाउँबाट सहर आए पछिका आफ्नै भोगाइ र अनुभूतिहरूलाई सँगालेर 'कोठा' तयार गरेको बताए । उनले धेरै नेपाली दर्शक तथा श्रोताहरूलाई साङ्गीतिक फिल्मले छुनेमा पनि आफू विश्वस्त रहेको बताए ।

नव–कलाकार प्रवीणकुमार पाण्डेको मुख्य अभिनय रहेको यस साङ्गीतिक फिल्ममा सबि थापा, सरोज खड्का, कल्पना साही र शीतल पाण्डेको अभिनय रहेको छ । यसै गरी सन्तोष बिस्ट, सृष्टि एैर, सागर भुसाल र अनिल दाहालको पनि अभिनय रहेको छ ।

सरोज श्रेष्ठको छायाङ्कन, रिदेन श्रेष्ठ र धिरज अधिकारीको सम्पादन रहेको यस साङ्गीतिक फिल्ममा निर्देशक जोशी र  कवि देव व्रतको शब्द सुन्न सकिन्छ । निर्देशक जोशीले यसअघि आर्ट घरबाटै 'समय र उमेर' सार्वजनिक गरेका थिए भने उनी नेपाली चलचित्र तथा रङ्गमञ्चका सक्रिय र उम्दा कलाकारसमेत हुन् ।