सेन्सर पास भयो ‘ताण्डवम्’, हटाइयो १० मिनेटको हिंसात्मक दृश्य

लेन्सनेपाल २०८१ फागुन ८

चलचित्र ‘ताण्डवम्’ले केन्द्रीय चलचित्र जाँच समिति (सेन्सर बोर्ड)बाट प्रदर्शन अनुमति पाएको छ । अत्याधिक हिंसात्मक दृश्य रहेको भन्दै सेन्सरमा रोकिएको चलचित्रको १० मिनेटको हिंसात्मक दृश्य काटिएको जनाइएको छ ।

उक्त दृष्य हटाएपछि बिहीबार पुनः चलचित्रको सेन्सर भएको थियो । सेन्सर पछि बोर्डले पिजी सर्टिफिकेट दिँदै रिलिजका लागि बाटो खुला गरिदिएको हो । अब यो चलचित्र १६ वर्षमुनिका बालबालिकाले अभिभावकको साथमा हेर्नुपर्नेछ ।

चलचित्रका निर्देशक तथा अभिनेता जुनिम गहतराजले कथाको मर्म नमर्ने गरि हिंसात्मक दृश्य काटिएको बताए । पहिलो पटक सेन्सर गर्न लैजाँदा २ घण्टा ६ मिनेट रनटाइम रहेको चलचित्र अब १ घण्टा ५६ मिनेटमा सीमित भएको छ ।

भोलि शुक्रबार अर्थात् फागुन ९ गतेबाट प्रदर्शनमा आउन लागेको चलचित्रमा जुनिमसहित पुष्कर गुरुङ, प्रेम सुब्बा, अंकित खड्का, सरिना मगर, अनोज पाण्डे, कमल कार्की, गोपाल कटुवाल लगायतको अभिनय रहेको छ । चलचित्रको कथा एक नवविवाहित जोडी पहिलो सन्तानको स्वागतको तयारीमा रहँदा उनीहरूको जीवनमा घट्ने अकल्पनीय घटनाले निम्त्याउने उतारचढावमा केन्द्रित छ ।