‘द भ्वाइस अफ नेपाल’को दोस्रो सिजन हिमालय टिभीमा

इन्टरनेशनल फ्रेन्चाइज शो ‘द भ्वाइस अफ नेपाल सिजन २’ को औपचारिक घोषणा गरिएको छ । गत वर्ष सम्पन्न पहिलो सिजन कान्तिपुर टिभी र डिसहोम रमाइलो टिभीबाट प्रसारण गरेको एनसी मिडियाले यसपटक भने हिमालय टिभीबाट कार्यक्रम प्रशारण गर्ने भएको छ ।

हिमालय टेलिभिजनको एचडी सेवा शुभारम्भसँगै गत माघ १ गतेबाट सुरु भएको डिजिटल अडिसनमा अहिलेसम्म झण्डै १० हजार प्रतिष्पर्धीले सहभागिता जनाएको राजधानीमा आयोजित कार्यक्रमका बिच जानकारी दिइएको छ । अब बन्नेछ आबाज नै पहिचान भन्ने स्लोगान सहित शुरु भएको द भ्वाइस अफ नेपालको सिजन २ का लागि पनि द भ्वाइस अफ नेपालको मोबाइल एप डाउनलोड गरी गीत रेकर्ड गरेर अडिसनमा सहभागीता जनाउन सकिने छ । यस्तै फेसबुक वा भाइबरजस्ता म्यासेजिङ एपमार्फत पनि आफ्नो स्वर रेकर्ड गरी पठाएर अडिसनमा सहभागिता जनाउन सक्ने आयोजकले बताएका छन् । अडिसनलाई सहज र सर्वसुलभ बनाउन यसपटकदेखि सामाजिक सञ्जालको समेत उपयोग गरिएको शो निर्देशक लक्ष्मण पौडेलले जनाएका छन् । निर्देशक पौडेलले इन्टरनेटको पहुँचमा नभएका प्रतिभाहरुले फोन गरेर पनि भ्वाइस निर्माण टीमलाई आफ्नो आवाज सुनाई सहभागी हुन सक्ने बताए । भाइबरमा आफ्नो आवाज रेकर्ड गरी ९८२३६१४१८५ मा पठाउन सकिने छ भने सिधै कल गरेर रेकर्ड पनि गराउन सकिनेछ ।

डिजिटल अडिसनमा सहभागी हुने समय चैत १० गते सम्म तोकिएको छ भने आउँदो असारबाट कार्यक्रम प्रशारण हुने कार्यकारी निर्माता शुशिल नेपालले जनाएका छन् ।