‘जाइरा’को सेलिब्रेटी शो, कलाकारले गरे नम्रताको प्रसंसा

लेन्सनेपाल २०७६ भाद्र ११
‘जाइरा’को सेलिब्रेटी शो, कलाकारले गरे नम्रताको प्रसंसा

चलचित्र ‘जाइरा’को सेलिब्रेटी शो गरिएको छ । एक्सन लभस्टोरी चलचित्र हेरेपछि सेलिब्रेटीहरुले राम्रो प्रतिक्रिया दिएका छन् । आशुतोष राज श्रेष्ठ निर्देशित चलचित्र हेरेका कलाकर्मीहरुले अभिनेत्री नम्रता श्रेष्ठको अभिनय र मार्शल आर्ट खेलाडी बन्न गरेको मेहनतको मुक्तकण्ठले प्रशंसा गरे । 

अभिनेता भुवन केसीले चलचित्रले उठाएको विषयवस्तु फरक रहेको बताए । उनले भने, ‘नम्रताले निकै फरक भूमिका गरेकी छिन् । र, निकै मेहनत पनि गरेकी छन् । अरु कलाकारले पनि राम्रो काम गरेका छन् । नेगेटिभ भूमिकामा अभिनय गर्नुभएको श्रृजना रेग्मीको काम सबैभन्दा उत्कृष्ट लाग्यो ।’

यस्तै अभिनेत्री गौरी मल्लले पनि अभिनेता भुवनकै कुरामा सहमति जनाइन् । ‘मलाई रिङको फाइट मनपर्‍यो, बुलेट र जाइराको । चलचित्र एकदमै राम्रो लाग्यो । नम्रताले गरेको मेहनत पर्दामा देखिन्छ । प्रमोद अग्रहरीको काम पनि उत्कृष्ट छ’, उनले भनिन् । अभिनेत्री रेखा थापाले पनि नम्रताको मेहनतको प्रशंसा गरिन् । उनले नेगेटिभ रोल गर्ने श्रृजना रेग्मीको काम पनि मन परेको बताइन् । 

‘राते काइला’ उपनामले परिचित सुनिल थापा पनि अभिनेत्री नम्रताको मेहनतको प्रशंसा गरेर थाकेनन् । नेपालमा ‘जाइरा’ जस्तो चलचित्र बन्नु ठूलो हिम्मतको काम रहेको बताउँदै उनले भने, ‘स्पोर्टस् लभर दर्शकले चलचित्र नछुटाउँदा राम्रो हुन्छ । पर्दामा नम्रतालाई हेर्दा रियल फाइटर महशुस हुन्छ । बुलेटको भूमिका निभाउने श्रृजनाको काम पनि गजब लाग्यो ।’ 

अभिनेत्री केकी अधिकारीले फिल्म निकै फरक लागेको बताइन् । नम्रताको मेहनतको प्रशंसा गर्दै उनले भनिन्, ‘हामीहरु यस्तो चलचित्र  बनाउनुपर्छ भनेर सोच्छौं मात्र तर उहाँहरुले बनाएरै देखाउनुभयो । कल्पनामा मात्र हुने चिज देख्न पाइयो । चलचित्र एकदमै राम्रो छ । मेरो दिमागमा अझै पनि क्लाइमेक्स सिन बसिरहेको छ । श्रृजना, प्रमोद, अनुप सबैको काम उम्दा छ ।’ 

अभिनेत्री रिमा विश्वकर्माले पनि चलचित्र राम्रो लागेको प्रतिक्रिया दिइन् । हास्यकलाकार सन्दिप क्षेत्री पनि नम्रताको प्रशंसा गरेर थाकेनन् । ‘चलचित्रमा नम्रताको मेहनत देखिएको छ । अभिनय पनि मनछुने छ । फिल्मको एक्सन सिक्वेन्स गजब छ’, उनले भने । 

‘जाइरा’ मा नम्रतासँगै प्रमोद अग्रहरी, अनुप बिक्रम शाही, रेमन दास श्रेष्ठ, नव–कलाकारहरु श्रृजना रेग्मी, सुजता श्रेष्ठ र सम्राट मगरलगायतको अभिनय छ । प्रशन्न गोपाली कार्यकारी निर्माता रहेको चलचित्रलाई बाबु श्रेष्ठले खिचेका हुन् भने लोकेश बज्रचार्यको सम्पादन छ । चलचित्रको पटकथा निर्देशक श्रेष्ठ र निरोज महर्जनको हो । चलचित्रमा सम्राट बस्नेको द्वन्द्व निर्देशन छ ।