छायाछवि क्रियसनले आगामी २६ चैतमा आयोजना गर्न लागेको १२ औं संस्करणको डी सिने अवार्डका लागि सम्मान एवं पुरस्कारको घोषणा गरेको छ । क्रियसनले छायाछवि लाइफटाइम लिजेन्ड्री अवार्ड, छायाछवि चलचित्रकर्मी रजत सम्मान (पुरुष र महिला) र छायाछवि चलचित्र पत्रकारिता पुरस्कारको घोषणा गरेको हो।

यसअनुसार यस वर्षको छायाछवि लाइफटाइम लिजेन्ड्री अवार्डबाट नेपालकी पहिलो अभिनेत्री भुवन चन्द सम्मानित हुँदै छन् । २०२२ सालमा निर्मित चलचित्रआमामा अभिनय गरेर नेपालकै पहिलो अभिनेत्री बनेकी भुवनले यसपछि हिजो आज भोली, दुई थोपा आँसु, कोसेली सीमारेखा, नेपालीबाबुलगायत धेरै चलचित्रहरूमा अभिनय गरेकी छन् ।

त्यस्तै, छायाछवि चलचित्रकर्मी रजत सम्मान (पुरुष) अभिनेता विजय लामालाई प्रदान गरिने भएको छ । २०४१ सालमा चलचित्र आदर्श नारीबाट अभिनय यात्रा सुरु गरेका विजयले कोसेली, चोखो माया, ट्रक ड्राइभर, आर्मी, होमवर्क, इन्टुमिन्टु लण्डनमालगायतका करिब २ दर्जन चलचित्रमा अभिनय गरेका छन् । केही हलिउड चलचित्रमा पनि अभिनय गरिसकेका लामा नेपाल एयरलाइन्सका सिनियर पाइलटसमेत हुन् । यस्तै छायाछवि चलचित्रकर्मी रजत सम्मान (महिला) अभिनेत्री तथा निर्देशक झरना थापालाई प्रदान गरिने भएको छ । २०५३ सालमा चलचित्र दाइजोबाट नेपाली रजतपटमा पाइला चालेकी झरनाले धर्मसङ्कट, गोर्खाली, बादलपारि, जीवनसाथी, पूर्णिमा, ए मेरो हजुर, मेरी आमा, बिदाई, ओमलगायतका चलचित्रमा अभिनय गरिसकेकी  छन् । उनले चलचित्र ए मेरो हजुर २ बाट निर्देशनमा डेब्यु गरेकी हुन् ।

यस्तै छायाछविले पत्रकार विष्णु सुवेदीलाई छायाछवि चलचित्र पत्रकारिता पुरस्कारबाट पुरस्कृत गर्ने निर्णय गरेको छ । रेडियोबाट पत्रकारिता  सुरु गरेका सुवेदीले टेलिभिजन हुँदै पछिल्लो समय अनलाइनका माध्यमबाट पत्रकारिता गरिरहेका छन् । डेढ दशकदेखी पत्रकारितामा संलग्न सुबेदी लेन्सनेपालडटकमका संस्थापक हुन् ।